अन्जना विसंखेले पनि छोडिन जनार्दन शर्माको साथ

काठमाडौं । माओवादी, एकीकृत समाजवादी लगायत दलहरुबीचको एकता प्रक्रियामा असहमति जनाउँदै अलग्गै पार्टी अभ्यासमा लागेका जनार्दन शर्मा थप कमजोर बनेका छन् । 

अलग पार्टी अभ्यासका क्रममा नेता शर्मासँगै उभिएर पत्रकार सम्मेलनमा देखिएकी र प्रगतिशिल अभियान चलाउने उदघोष गरेकी तत्कालिन माओवादीकी स्थायी समिति सदस्य अन्जना विसंखेले शर्माको साथ छोडिदिएकी छिन् । 

उनी आइतबारबाट एकीकृत पार्टी नेपाली कम्युनिष्ट पार्टीमै आवद्द हुन आईपुगेकी छिन् । ‘उहाँ (अन्जना जी) फेरि नेपाली कम्युनिष्ट पार्टीमै आबद्द हुन आईपुग्नुभएको छ,’ नेपाली कम्युनिष्ट पार्टीका केन्द्रीय कार्यालयका एक सदस्यले सफलखबरसँग भने, ‘आइतबार उहाँ (अन्जना) पार्टी केन्द्रीय कार्यालय आउनुभयो । एकता प्रक्रिायमा सहभागी हुने बताउनुभयो । पार्टीको दल दर्ताका लागि निर्वाचन आयोगमा पेश गर्ने कागजपत्रमा हस्ताक्षर गर्नुभयो ।’

तत्कालिन माओवादीभित्र शर्मालाई राम कार्की, अन्जना विसंखे र सुदन किराँती लगायत चिरपरिचित अनुहारले साथ दिएका थिए । विसंखेले शर्माको अहिले साथ छोडिदिइन् । उनले पार्टी नेता नारायाणकाजी श्रेष्ठसँग सम्वाद गरेपछि फेरि एकता प्रक्रियामा जोडिन पुगेकी हुन् । 

तत्कालिन नेकपा (माओवादी केन्द्र)मै हुँदा पार्टी संयोजक प्रचण्डसँग भेट गर्न नपाएकी भन्दै विसंखे असन्तुष्ट रहँदै आएकी थिइन् । नेपाली कम्युनिष्ट पार्टीका नेता वर्षमान पुनले जनार्दनहरु पनि कुनै न कुनै मोडमा नेपाली कम्युनिष्ट पार्टीमै धुव्रिकृत हुन आईपुग्ने बताएका छन् । 

‘जनार्दन जीहरु पनि कुनै मोडमा यही पार्टीमा आईपुग्नुहुन्छ,’ पुनले सफलखबरसँग भने । नेपाली कम्युनिष्ट पार्टीले अशोक राई नेतृत्वको पार्टी र सुदूरपश्चिममा नेता भीम रावलसाग पनि पार्टी एकताका लागि छलफल चलाईरहेका छन् ।

आइतबार रावलसँग नेपाली कम्युनिष्ट पार्टीका संयोजक प्रचण्ड र सहसंयोजक माधव नेपालले भेट गरेर छलफल गरेका थिए । रावलले नेपाली कम्युनिष्ट पार्टीमा सहभागी हुने विषयमा सकारात्मक जवाफ दिएका छन् । उनले एक साताभित्र यसबारेमा आफु निर्णय लिने बताएका छन् ।