शक्ति केन्द्रले पार्टी फुटायो: डा. सीके राउत

काठमाडौँ । जनमत पार्टीका अध्यक्ष डा. सीके राउतले आफ्नो पार्टी कुनै शक्ति केन्द्रको चलखेलमा परेर विभाजन भएको दाबी गरेका छन्। उनले सामाजिक सञ्जालमार्फत प्रतिक्रिया दिँदै पार्टी फुटाउने प्रयास एक वर्षदेखि भइरहे पनि आफूले अहिलेसम्म पार्टी जोगाउँदै ल्याएको बताए।

आइतबार फेसबुक लाइभमार्फत बोल्दै डा. राउतले जनमत पार्टी विभाजन हुनु कुनै नयाँ घटना नभएको बताएका छन्। उनले भने, ‘पार्टी फोड्नेहरूसँग मेरो कुनै गुनासो छैन, बरु भनेको भए माला लगाएरै बिदाइ गर्थेँ।’ उनका अनुसार, पार्टी सत्तामा पुगेपछि नेताहरूमा बढेको महत्त्वाकाङ्क्षाले विवाद उत्पन्न गरेको हो।

डा. राउतले आफूलाई जनतामाथि विश्वास रहेको बताउँदै भने, ‘जनताले जे निर्णय गर्छ, म त्यसलाई नै स्विकार्छु। कोही पार्टी छोडेर गयो भनेर केही फरक पर्दैन।’

उनका अनुसार, विगत एक वर्षदेखि विभिन्न शक्ति केन्द्रले पार्टी फुटाउन प्रयत्न गरिरहेका थिए। कसैको उक्साहटमा पार्टी विभाजन गरेर धेरै दिनसम्म पार्टीमा टिक्न नसक्ने बताउँदै उनले आफ्नो लागि यो नयाँ कुरा नरहेको बताए । 

यसैबिच, पार्टीबाट कारबाहीमा परेका नेता दीपक साहले बहुमत केन्द्रीय सदस्य लिएर नयाँ पार्टी दर्ताका लागि आइतबारै निर्वाचन आयोगमा निवेदन दिएका छन्। साहले आफूसँग बहुमत रहेको दाबी गरेका छन्।