'परिस्थिति अझै खराब दिशातर्फ नजाला भन्ने अवस्था छैन' : गोकुल बाँस्कोटा

काठमाडौ । नेकपा एमालेमा अध्यक्ष केपी शर्मा ओलीले नेतृत्व छाड्नुपर्ने दबाब बढिरहेका बेला पार्टीका पोलिटब्युरो सदस्य गोकुल बाँस्कोटाले यसप्रतिको बेवास्ताले परिस्थित अझै खराब हुने खतरा रहेको चेतावनी दिएका छन्।

जेनजी आन्दोलनका कारण प्रधानमन्त्री पदबाट विस्थापित ओलीले नेताहरूको दबाबका बाबजुद अझै एमालेको नेतृत्व नछाड्ने अडान लिइरहेका छन्। 

शुक्रबार मात्र भक्तपुरस्थित ओली निवासमा बसेको सचिवालय बैठकमा उपाध्यक्ष अष्टलक्ष्मी शाक्यले अध्यक्ष ओलीसहित पहिलो पुस्ताका नेताले बिदा लिनुपर्ने लिखित प्रस्ताव राखेकी छन् भने उपाध्यक्ष युवराज ज्ञवालीले पनि अध्यक्ष ओलीलाई पद त्याग गर्न सुझाव दिएका छन्।

यसैबीच जेनजी आन्दोलनभन्दा अघिदेखि नै ओलीप्रति आलोचक बनेका बाँस्कोटाले शनिबार बिहान सामाजिक सञ्जालमा लेखेका छन्, ‘मूलत: आन्तरिक असन्तुष्टि र भद्रगोल अनि त्यसप्रतिको पूर्णत: बेवास्तामाथि अन्य चलखेलको जगको पछिल्लो राजनितिक परिदृश्यका भाग दुई र तीनका लेखाजोखा बाँकी नै रहेजस्तो देखिन्छ। के थाहा परिस्थिति अझै खराब दिशातर्फ नजाला भन्ने अवस्था अझै छैन।’