युवा संघको चेतावनीः आइतबारसम्म मोटरसाइकल र्‍याली गर्न नदिइए सरकारविरुद्ध सडकमा उत्रिएर देखाउँछौ

काठमाडौं, । नेकपा (एमाले) निकट युवा संगठन राष्ट्रिय युवा संघले आफूहरुलाई २४ घण्टाभित्र मोटरसाइकल र्‍याली गर्न अनुमति दिन सरकारलाई अल्टिमेटम दिएको छ । राष्ट्रिय युवासंघका अध्यक्ष अध्यक्ष क्षितिज थेबेले २४ घण्टाभित्र (आगामी आइतबारसम्म) आफूहरुलाई मोटरसाइकल र्‍याली गर्ने अनुमति नदिइएको खण्डमा सरकारको विरुद्धमा सडकमा उत्रिन बाध्य हुने चेतावनी दिएका हुन् ।

‘आइतबार हामीलाई शान्तिपूर्ण बाइक र्‍याली गर्न दिइएन भने, सरकारले हाम्रो विधिको शासन मान्ने र स्वीकार गर्ने कुरालाई कमजोर मान्ने हो भने हामी सडकमा ओर्लिएर सरकारको विरुद्धमा लाग्ने हो भने चुड्कीको भर पनि रोक्ने सक्दैन यो सरकारले,’– अध्यक्ष थेबेले भने ।

राष्ट्रिय युवा संघले भोलि (शनिबार) गर्ने भनिएको बाइक र्‍याली रोकेर सरकारले मौलिक हकमा बन्देज लगाएको अध्यक्ष थेबेको भनाइ छ । उनले शान्ति स्थापना र नागरिकको रक्षाका लागि आफूहरुले गर्न लागेको मोटरसाइकल र्‍याली रोकेर सरकारले लोकतन्त्रको धज्जी उठाएको बताए ।

‘शान्तिपूर्ण प्रदर्शन गर्ने विषय लोकतन्त्रमा नागरिकको मौलिक हक हो । मौलिक हकलाई पनि बञ्चित गर्दै आज सरकार अधिनायकवादतर्फ अगाडि बढिराखेको छ, निरङ्कुशतातर्फ अगाडि बढिराखेको छ । शान्ति स्थापना र नागरिकको रक्षाका लागि गर्न लागिएको मोटरसाइकल र्‍यालीलाई रोकेर यो सरकारले लोकतन्त्रको धज्जी उडाएको छ,’– उनले भने ।

उनले अधिनायक र निरङ्कुशतावाद हाबी हुन थालेको भन्दै सच्चिनका लागि सरकारलाई सुझाव दिए । आफूहरुले सुशान, विधिको शासन र कानूनी राज्य मानेकाले सरकारले लगाएको रोकलाई स्वीकार गरिएको उनले बताए । उनले आफूहरुको यो अनुशासनलाई कमजोरी नठान्न सरकारलाई आग्रह गरे ।