एमाले सचिवालय बैठक आज, के गर्ला निर्णय ?

काठमाडौं । चुनाव होइन संसद पूर्नस्थापना माग गर्ने र भोलि शनिबार काठमाडौंमा पार्टीका जनवर्गीय संगठनको नेतृत्वमा मोटरसाइकल रयाली निकाल्ने तयारीमा रहेको नेकपा एमालेको आज सचिवालय बैठक बस्दैछ ।

बैठकको पूर्वसन्ध्यामा आफु निकट नेताहरुलाई सँगै राखेर ओलीले अन्तरिम सरकार बनेको एक महिनापछि हिजो बिहिबार प्रतिनिधिसभा पुनर्स्थापनाको एजेण्डा उठाउने र सरकारका निर्णयहरूविरुद्ध प्रतिवादकै तयारी गरेर चुनावी प्रक्रियालाई भने अन्योलतिर धकेल्ने नीतिको वकालत गरेका छन् ।

आँफुले सक्दा सम्म नेतृत्व नछोडने र नसकेपछि मात्र नेतृत्व छोडने हुँकार र दम्भ पनि देखाएका ओलीले सरकार नै अवैधानिक बनेको, गृहमन्त्रीमा केटाकेटीपन देखिएको र जेनजी आन्दोलनका क्रममा भएका घटनाको अध्ययन गर्न गठित छानबिन आयोग पूर्वाग्रही भएकोले नमान्ने उद्घोष ओलीले गरिसकेका छन् ।

पार्टीभित्रै उनको विकल्प अव खोज्नुपर्ने मत क्रमशः बलियो बनिरहेका बेला ओलीले राजनीतिलाई अन्यत्र मोडन नयाँ फन्डा अगाडी सार्दै मुलुकलाई मुठभेडको बाटोतिर लैजान चाहेका छन् । यही परिवेशमा आज उसको सचिवालय बैठक बस्दैछ ।

बैठकमा समसामयिक राजनीतिक परिस्थिति, पार्टीका आन्तरिक विषयको व्यवस्थापन, जेनजी आन्दोलनपछि पार्टीको अवस्था र आसन्न केन्द्रीय कमिटीका एजेण्डाका बारेमा छलफल गरेर ठोस धारणा तय गर्ने बताइएको छ ।

सचिवालयमा आज ओलीको नीति र ओलीले नेतृत्व नछोडने गरी लिन खोजिरहेको रवैयाको उनी इतर नेताहरुले शसक्त प्रतिवाद गर्ने तयारी गरेका छन् । राजनीतिमा फर्किन खोजिरहेकी पूर्व राष्ट्रपति विधा भण्डारीको सदस्यता समेत रोकेका ओलीविरुद्द भण्डारीलाई साथ दिएकाहरुको तर्फबाट कडा प्रतिवाद गर्ने नीति बनाएको बुझिएको छ ।

पार्टीमा फेरि पनि उमेरहद लगाउनु पर्ने, दुई कार्यकाल भन्दा बढी कार्यकारी नेतृत्व लिन नपाउने विषय फेरि उठ्ने देखिन्छ । कतिपयले अब नयाँ ढंगले नयाँ नेतृत्वमा सुरेन्द्र पाण्डेलाई अगाडी सारेर जानुपर्ने मत पनि उठाउन थालेका छन् ।

सचिवालय बैठक आज बोलाएको उसले केन्द्रीय समितिको बैठक भने दुई दिन पछि धकेलेको छ । बैठकको तयारी नपुगेकोले असोज २७ गते देखि गर्ने भनिएको बैठक असोज २९ देखि ३१ गतेसम्म बस्ने एमाले केन्द्रीय कार्यालयले जनाएको छ ।