नेकपा एसले बोलायो सचिवालय बैठक

काठमाडौँ। माधवकुमार नेपाल नेतृत्वको नेकपा एसले असोज २४ गते सचिवालय बैठक बोलाएको छ । उक्त पार्टीका उपाध्यक्ष तथा प्रचार विभाग प्रमुख प्रकाश ज्वालाका अनुसार मुख्यतः तीन एजेण्डामा छलफल गर्न उक्त बैठक बोलाइएको हो ।

यसअघिको सचिवालय बैठकले संविधान र लोकतन्त्र पक्षधर दल एकताबद्ध हुनुपर्छ र चुनावमा जान तयार हुनुपर्छ भनी गरेको निर्णय कार्यान्वयनको पहल गरिने उनले बताए । ‘हामीले निर्णय त गरेका छौँ, तर त्यसअनुसार दलहरूका बीचमा कुनै किसिमको विकास क्रम देखिँदैन, त्यसलाई कसरी प्रभावकारी बनाउने भन्नेबारे छलफल हुन्छ’, उनले भने ।

अघिल्लो बैठकले वरिष्ठ नेता बेदुराम भुसालको नेतृत्वमा गठन गरेको ‘विचार मिल्ने शक्तिसँग एकताको पहल’ सम्बन्धी कार्यदलले अहिलेसम्म गरेको प्रगति शुक्रवारको बैठकमा प्रस्तुत गरिने भएको छ । उपाध्यक्ष ज्वाला आफैँ पनि उक्त कार्यदल सदस्य हुन् । उनका अनुसार एकताका विषयमा विभिन्न पक्षसँग छलफल चलेको छ, तर कुनै ठोस निष्कर्षमा पुगेको छैन ।

गत भदौमा बोलाइएका विभिन्न तहका बैठकको मिति तोक्ने काम पनि शुक्रवारकै बैठकले गर्ने ज्वालाले बताए । स्थायी कमिटी, पोलिटब्युरो र केन्द्रीय कमिटीका बैठक तय गरिने उनको भनाइ छ ।