नेपाललाई ग्रे लिस्टबाट बाहिर निकाल्न सरकार कुनै कसर बाँकी राख्दैन’ : अर्थमन्त्री पौडेल

काठमाडौँ । उपप्रधानमन्त्री एवं अर्थमन्त्री विष्णुप्रसाद पौडेलले नेपाललाई ग्रे लिस्टबाट बाहिर निकाल्न सरकार कुनै कसर बाँकी नराखी काम गरिरहेको बताएका छन्। 

राष्ट्रिय सभामा सांसदहरूले उठाएका प्रश्नहरूको जवाफ दिँदै उनले भने, “हामी ग्रे लिस्टबाट बाहिर निस्कने मात्र होइन, फेरि कहिल्यै ग्रे लिस्टमा नपर्ने गरी कामकारबाही अघि बढाइरहेका छौँ। यसको परिणाम क्रमशः देखिनेछ।” अर्थमन्त्री पौडेलका अनुसार सरकारले दुई वर्षअघि नै नेपाललाई ग्रे लिस्टबाट हटाउने लक्ष्यसहित काम सुरु गरिसकेको थियो।

पौडेलले नेपालको सम्पत्ति शुद्धीकरण निवारणसम्बन्धी तेस्रो चरणको अन्तर्राष्ट्रिय पारस्परिक मूल्यांकन २०२२/२३ मा सम्पन्न हुँदा नियमन, सुपरिवेक्षण, अनुसन्धान, अभियोजन र सम्पत्ति जफतमा पर्याप्त प्रगति नदेखिएको कारण नेपाल ग्रे लिस्टमा परेको स्पष्ट पारे। कानुनी ढिलाइ पनि यसको अर्को कारण भएको उनले बताए। हाल भने २०८० चैत्र ३० मा विभिन्न १९ वटा ऐन संशोधन भएपछि सम्बन्धित निकायहरूले कार्यान्वयन अघि बढाइसकेको उनको भनाइ छ।