बजेटको प्राथमिकता मध्यमवर्गको सुदृढीकरणतर्फ केन्द्रित गरिएको अर्थमन्त्रीको दाबी

काठमाडौँ । अर्थमन्त्री डा. स्वर्णिम वाग्लेले चालु आर्थिक वर्षको बजेट निर्माण गर्दा मध्यमवर्गको संरक्षण र विस्तारलाई प्रमुख नीतिगत प्राथमिकतामा राखिएको बताएका छन्।

विगतका दशकहरूमा गरिबी न्यूनीकरणका नाममा मुख्यतः नगद हस्तान्तरणमा आधारित कार्यक्रमहरू सञ्चालन भए पनि त्यसबाट दिगो आर्थिक रूपान्तरण सम्भव नभएको निष्कर्षका आधारमा नयाँ दृष्टिकोण अपनाइएको उनको भनाइ छ।

काठमाडौँमा आयोजित फिन इन्फोटेक मेलालाई सम्बोधन गर्दै अर्थमन्त्री वाग्लेले सामाजिक सुरक्षाको परम्परागत ढाँचाभन्दा माथि उठेर नागरिकलाई आर्थिक रूपमा सबल बनाउने नीतिगत प्रयास बजेटमार्फत गरिएको बताए। उनका अनुसार राज्यको उद्देश्य केवल अनुदान वा नगद सहायता उपलब्ध गराउनु मात्र नभई निम्न आय वर्गलाई क्रमशः मध्यमवर्गीय आर्थिक हैसियततर्फ उकास्ने हुनुपर्छ।