यो पार्टीले गरिखाँदैन भन्नेलाई ठाउँ छैन, हाम्रो पार्टीको भविष्य छ : माधव नेपाल

काठमाडौं । नेकपा एकीकृत समाजवादीका अध्यक्ष माधव नेपालले पार्टीमै बसेर यो पार्टीले गरिखाँदैन भन्ने मान्छेलाई ठाउँ नभएको बताएका छन्। पार्टी कार्यालयमा आयोजित एक कार्यक्रममा बोल्दै उनले आफ्नो पार्टीको भविष्य रहेको जिकिर गरे।

उनले भने, ‘यो पार्टी सानो छ भनेर कुप्रचार कसैले पनि नगरुन्। ठुलो छ पनि भनिएको होइन। तर हामीले पार्टीलाई सशक्त बनाउनुपर्नेछ। ठुलो पार्टी बनाउनुपर्नेछ। जनताको विश्वास जितेर एउटा निर्णायक भूमिका खेल्नु स्थितिमा पुर्‍याउनुपर्छ भन्ने सोच राखेर अघि बढ्नुपर्नेछ। त्यसैले पार्टीलाई हामीले शक्तिशाली बनाउनुपर्छ, पार्टी शक्तिशाली छैन भने केही हुँदैन। त्यसैले पार्टीको पक्षमा प्रभाव फैलाउनुपर्नेछ।’

पार्टीभित्रका मान्छेहरूले पार्टी अगाडि बढ्छ भनेर सकारात्मक बहस गर्नुपर्ने बताए। उनले पार्टीका नेता सम्मानित नेता झलनाथ खनाललाई लक्षित गर्दै भने, ‘पार्टीमा बसेर यो पार्टीले गरिखाँदैन भन्ने मान्छेलाई यो पार्टीमा ठाउँ छैन। तिनीहरूलाई सम्मान गर्न सकिँदैन, त्यस्ता व्यक्तिहरू काम लाग्दैनन्। हामीले विश्वासको वातावरण बनाएर जनमत तयार पर्ने हो। विश्वास जगाउने हो। यहाँ बसेको मान्छेले पार्टीको पक्षमा जनमत तयार गर्ने हो। भ्रम चिरेर विश्वास जगाउने हो।’