संसद् निरीह भयो, दलहरूमा समस्या छ : पूर्वराष्ट्रपति भण्डारी

काठमाडौं । पूर्वराष्ट्रपति विद्यादेवी भण्डारीले वर्तमान संसद् र दलहरूको कार्यशैलीप्रति कडा टिप्पणीसहित आलोचना गरेकी छन् ।

मदन भण्डारी फाउन्डेसनको हीरक जयन्ती आयोजन समितिको सम्पर्क कार्यालय उद्घाटन कार्यक्रममा बिहीबार बोल्दै उनले संसद् निरीह थलोमा परिणत भएको बताइन् ।

‘हामी पूर्ण लोकतन्त्रमा छौँ, तर जनताको आकांक्षा पूरा हुन सकेको छैन। राजनीतिक दलहरूमा समस्या छ, दलहरू प्रणालीमा चल्न सकिरहेका छैनन्,’ उनले भनिन् ।

भण्डारीले ठूला दल कांग्रेस र एमाले संविधान संशोधनमा सहमत भए पनि संशोधनको आवश्यकता के हो भन्ने विषयमा गम्भीर छलफल नभएको उल्लेख गरिन् । 

उनले सांसदसहितका जनप्रतिनिधिमाथि आरोप पुष्टि नहुन्जेल निलम्बन गर्नु गलत भएको बताइन् । ‘कसैलाई आरोप लगाउँदैमा तुरुन्त निलम्बन गर्नु लोकतान्त्रिक होइन,’ उनले भनिन् ।

उनले सम्बोधनमा आफ्नो राजनीतिक यात्राको पनि स्मरण गरिन् । ‘म भोजपुरमा जन्मेको मान्छे हो। कोअर्डिनेशन केन्द्र हुँदै मालेमा पुग्यौँ, मालेबाट एमाले भयो । अहिले एमाले एउटा ब्रान्ड बनेको छ, यो देशभक्त र प्रगतिशील पार्टी हो’, उनले भनिन् । 

एमालेकी पूर्वउपाध्यक्षसमेत रहेकी उनले मदन भण्डारी फाउन्डेसनलाई थिंक ट्यांकको रूपमा अघि बढाइएको बताइन् र उनले जननेता भण्डारीको विचारलाई निरन्तरता दिनुपर्नेमा जोड दिइन् ।