सेयर बजारमा गिरावट, पाँच कम्पनीमा सकारात्मक सर्किट

काठमाडौँ । साताको अन्तिम कारोबार दिन बिहीबार पनि सेयर बजारमा गिरावटको यात्राले निरन्तरता पाएको छ । बुधबारदेखि घट्न सुरु भएको बजारमा आज थप ३१.५० अङ्कको गिरावट आएको हो। योसँगै नेपाल स्टक एक्सचेन्ज (नेप्से) परिसूचक २९२२.६३ विन्दुमा झरेको छ । बुधबार नेप्से परिसूचक झण्डै ४८ अङ्कले घटेको थियो । 

आज बजारमा कारोबार भएका कुल २५० कम्पनीमध्ये १९८ कम्पनीको सेयर मूल्यमा गिरावट आएको छ भने जम्मा ५२ कम्पनीको मूल्य मात्र बढेको छ। आज बजारका १३ समूहका सूचकमध्ये फाइनान्स सूचक मात्रै बढेको छ । बाँकी सबै सूचकमा गिरावट आएको छ । 

समग्र बजार ओरालो लागेपनि आज पाँच वटा कम्पनीको सेयर मूल्यमा भने सकारात्मक सर्किटको नजिक पुगेको छ । ट्रेड टावर, नेपाल फाइनान्स, कर्पोरेट डेभलपमेन्ट बैंक, ग्रीन डेभलपमेन्ट बैंक र सप्तकोशी डेभलपमेन्ट बैंकको सेयर मूल्य सकारात्मक सर्किटको नजिक पुगेको हो । आज सर्वाधिक गुमाउनेमा भुगोल इनर्जीका लगानीकर्ता रहे । 

जसको सेयर मूल्य ७.१० प्रतिशतले घटेको छ । आज बजारमा कारोबार रकम भने उत्साहजनक देखिएको छ।  दिनभरमा ३ करोड ६८ लाख ७१ हजार २४४ कित्ता सेयर किनबेच हुँदा कुल १५ अर्ब ९८ करोड ९१ लाख रुपैयाँ भन्दा बढीको कारोबार भएको छ ।

कारोबार रकमका आधारमा आज हिमालयन रिइन्स्योरेन्सले १ अर्ब ३३ करोडभन्दा बढीको कारोबार गर्दै शीर्ष स्थानमा रह्यो । त्यसैगरी, नेपाल रिइन्स्योरेन्स कम्पनी र हिमालयन डिस्टिलरी क्रमशः दोस्रो र तेस्रो स्थानमा रहे ।