शनिबार बिहानको आक्रमणमा इजरायलमा दुई जनाको मृत्यु

तेल अभिभ । इरानको प्रतिउत्तर स्वरूप इजरायलमा गरिएको आक्रमणमा शनिबार कम्तीमा दुई जनाको ज्यान गएको छ । यसअघि, इजरायली आपत्कालीन सेवा मगेन डेविड एडोम (एमडीए) का अनुसार इजरायलको कोस्टल प्लेन्स क्षेत्रमा २१ जना घाइते भएको जानकारी दिइएको थियो ।

एमडीएले जनाएको अनुसार ६० वर्षको हाराहारीकी एक महिलालाई बेहोस अवस्थामा उद्धार गरिएको थियो, जसमा कुनै पनि जीवनको सङ्केत देखिएको थिएन। त्यस्तै, करिब ४५ वर्षको एक पुरुषलाई उद्धार गरी अस्पताल लगिए पनि पछि मृत घोषित गरिएको हो। अर्कोतर्फ, इजरायलको यातायात मन्त्रालयले देशको हवाई मार्ग ‘अर्को सूचना नआएसम्मका लागि बन्द’ रहने जानकारी दिएको छ।

यसमा बेन गुरियन विमानस्थल पनि समावेश छ, जसले सबै आगमन तथा प्रस्थान हुने उडानहरू अर्को सूचना नभएसम्मका लागि स्थगित गरिएको जनाएको छ। आज बिहानसम्म विमानस्थलको वेबसाइट पनि काम नगरेको देखिएको छ।

मन्त्रालयले यात्रा गर्ने तयारीमा रहेका यात्रुहरूलाई हवाई मार्ग खुल्ने कम्तीमा ६ घण्टा अगाडि मिडिया मार्फत जानकारी दिइने बताएको छ।