भरतपुरमा किशोरमाथि चक्कु प्रहार, संलग्न व्यक्तिहरू फरार

चितवन। चितवनको भरतपुर महानगरपालिका–१२ नौरङे चोक अगाडि एक किशोरमाथि धारिलो हतियार प्रहार भएको छ।

प्राप्त जानकारीअनुसार मिति २०८३ जेठ ३१ गते दिउँसो करिब १:४५ बजे भरतपुर–१२ निवासी १६ वर्षीय रिदम पराजुलीमाथि केही व्यक्तिहरूले चक्कु प्रहार गरी घाइते बनाएका हुन्।

घटनामा आस्थाचोक निवासी मिसन पौडेल, भरतपुर–१० निवासी जेनिस गुरुङ लगायत अन्य ३–४ जना व्यक्तिहरू स्कुटीमा आएर आक्रमण गरेको प्रारम्भिक अनुसन्धानबाट खुलेको प्रहरीले जनाएको छ।

घटनापछि संलग्न व्यक्तिहरू फरार रहेका छन्। घाइतेको उपचार भइरहेको छ भने फरार व्यक्तिहरूको खोजतलास तथा घटनाबारे थप अनुसन्धान भइरहेको प्रहरीले जनाएको छ।