अमेरिकामा बच्चा र गर्भवती महिलालाई कोभिड विरुद्धको खोप नलगाइने

वासिङ्टन डीसी । अमेरिकी स्वास्थ्य मन्त्री रोबर्ट एफ.केनेडी जूनियरले मंगलबार एक भिडियो जारी गर्दै स्वस्थ बालबालिका र गर्भवती महिलाहरूलाई अब कोभिड–१९ विरुद्धको खोप लगाउन सिफारिस नगरिने घोषणा गरेका छन् । सामाजिक सञ्जाल प्लेटफर्म एक्समा मा पोस्ट गरिएको ५८ सेकेन्डको भिडियोमा केनेडीले यो कुरा बताएका हुन् ।

रोग नियन्त्रण तथा रोकथाम केन्द्र (सीडीसी)को आधिकारिक सिफारिसहरूमा यी परिवर्तन गरिएको उनले बताए । यद्यपि, यस भिडियोमा कुनै पनि सीडीसी अधिकारी उपस्थित थिएनन् । रोचक कुरा त के छ भने सीडीसीले यस विषयमा टिप्पणी गर्न अस्वीकार गरेको छ । उसले उल्टै यस मामिलामा केनेडी र स्वास्थ्य मन्त्रालयलाई सम्पर्क गर्न भनेको छ ।

अमेरिकी स्वास्थ्य विज्ञहरूले अहिलेसम्म ६ महिनाभन्दा माथिका सबै मानिसहरूलाई प्रत्येक वर्ष कोभिड–१९ विरुद्धको बुस्टर डोज लिन सल्लाह दिइरहेका छन् । सीडीसीको सल्लाहकार टोलीको बैठक जुनमा बस्दैछ । यसले यस वर्षको अन्त्यमा कसलाई खोप लगाउने भन्ने निर्णय गर्ने बताइएको छ ।

तर केनेडीले यो बैठक नै कुरेनन् । उनले कुनै स्पष्ट वैज्ञानिक तथ्याङ्क बिना नै हरेक वर्ष बच्चाहरूलाई कोभिड खोप सिफारिस गरिँदै आएको बताए । भिडियोमा, उनीसँगै खाद्य तथा औषधि प्रशासन (एफडीए)का प्रमुख डा.मार्टी मकारी र राष्ट्रिय स्वास्थ्य संस्थान (एनआईएस)का प्रमुख डा.जय भट्टाचार्य पनि थिए ।