गृह मन्त्रालयद्वारा दुई डीआईजीको सरुवा, अख्तियारमा पौडेल, हेडक्वार्टरमा खनाल

काठमाडौँ । प्रहरी नायव महानिरीक्षक (डिआइजी) अरुण पौडेल र शेखर खनालको जिम्मेवारी परिवर्तन गरिएको छ ।

गृह मन्त्रालयको निर्णयअनुसार नेपाल प्रहरी प्रधान कार्यालय, मानवस्रोत विकास विभागअन्तर्गत कर्मचारी प्रशासन शाखाले दुवै अधिकृतको परस्पर सरुवा गरेको हो।

सरुवा आदेशबमोजिम नेपाल प्रहरी प्रधान कार्यालयको कार्य विभाग, कार्य निर्देशनालय, नक्सालमा कार्यरत डिआइजी अरुण पौडेललाई अख्तियार दुरुपयोग अनुसन्धान आयोगको प्रहरी महाशाखा, टंगालमा सरुवा गरिएको छ।

यस्तै, अख्तियार दुरुपयोग अनुसन्धान आयोगको प्रहरी महाशाखा, टंगालमा कार्यरत डिआइजी शेखर खनाललाई नेपाल प्रहरी प्रधान कार्यालयको कार्य विभाग, कार्य निर्देशनालय, नक्सालमा सरुवा गरिएको छ।