जनविरोधी गतिविधिविरुद्ध सिङ्गो पार्टी एक ढिक्का भएर लाग्नुपर्छ : शंकर पोखरेल

काठमाडौ । नेकपा (एमाले)का महासचिव शंकर पोखरेलले लोकतान्त्रिक गणतन्त्र विरोधीहरू जनविरोधीसमेत भएका टिप्पणी गरेका छन् । लोकतान्त्रिक गणतन्त्रविरुद्ध हुने गतिविधिहरू जनता विरुद्धका गतिविधि भएको उनले बताए । 

जनविरोधी गतिविधिविरुद्ध सिङ्गो पार्टी एक ढिक्का भएर लाग्नु पर्ने उनको भनाइ छ । ‘लोकतान्त्रिक गणतन्त्रविरुद्धमा हुने सबै गतिविधिहरू जनताको सम्प्रभुता विरुद्धका अर्थात् जनता विरुद्धका गतिविधिहरू हुन् भन्ने कुरामा आम जनतालाई सचेत र जागरूक बनाउने अभियानमा सिङ्गो पार्टी पंक्ति क्रियाशील हुनु पर्दछ’, पोखरेलले भने । 

गणतन्त्र दिवस जनताको उत्सवको दिन भएकोले पार्टीले विशेष रूपमा मनाउन लागेको उनले बताए । पार्टी सचिवालयको ५२औँ बैठकले जेठ १५ गतेको गणतन्त्र दिवसलाई उत्सवका रूपमा मनाउने निर्णय गरेको उनले जानकारी दिए । 

गणतन्त्र दिवसलाई विविध कार्यक्रमको आयोजनागरी उत्सवको रूपमा मनाउन आमजनसमुदायलाई एमालेले आह्वान गरेको छ । जिल्ला कमिटीको संयोजन र पालिका कमिटीको आयोजनामा पालिका स्तरमा देशभरी गणतन्त्र दिवस मनाउने निर्णय एमालेले गरेको छ । 

काठमाडौं उपत्यकाको हकमा उपत्यकाका पार्टी कमिटी र पार्टी सम्बद्ध सङ्गठनहरूको आयोजनामा सांस्कृतिक झाँकीसहित विशेष कार्यक्रम आयोजना गर्ने निर्णय एमालेको छ ।

प्रदेश कमिटी र जिल्ला कमिटीहरूले विभिन्न संघसंस्थालाई गणतन्त्र दिवस उत्सवका रूपमा मनाउन विविध प्रकारका रचनात्मक कार्यक्रम आयोजना गर्न प्रेरित गर्ने पोखरेलले जानकारी दिए ।

आवश्यकताअनुसार उपत्यकाको हकमा केन्द्रीय कार्यालय र उपत्यका बाहिर प्रदेश र जिल्लाले नेतृत्वलाई परिचालन गर्ने पनि उनले जानकारी दिए ।