पत्रकार डेकेन्द्रराजको घरमा पुगे प्रचण्ड

सुर्खेत । नेकपा (माओवादी केन्द्र) का अध्यक्ष पुष्पकमल दाहाल ‘प्रचण्ड’ सोमबार बिहानै १० वर्षे सशस्त्र युद्धका क्रममा तत्कालीन विद्रोही माओवादी पक्षबाट हत्या गरिएको दैलेखका पत्रकार डेकेन्द्रराज थापाको घरमा पुगेका छन् ।

‘मध्यपहाडी राजमार्ग अभियान’ अन्तर्गत अछाम हुँदै आइतबार दैलेख पुगेका प्रचण्ड सदरमुकामको जनसभालाई सम्बोधन गरेर त्यहीँ बास बसेका थिए । सोमबार बिहानै सदरमुकामको काँडाचौरदेखि गढीसम्म मर्निङ वाकमा निस्किएका उनले सदरमुकाममा रहेको डेकेन्द्रराज थापाको सालिकमा फुलमाला माल्यार्पण गरे । लगत्तै उनी थापाको घरमै पुगे ।

थापाको घर प्रचण्ड बसेको होटेलभन्दा करिब ५ सय मिटरको दुरीमा थियो । प्रचण्ड घरमा पुगेपछि थापाका परिवारले खादामालाले सम्मान गरे । थापाका कान्छा भाइ यज्ञराजा थापाका अनुसार प्रचण्डले उक्त घटनाबारे पुनः आत्मालोचना गरे । ‘हामीबाट गल्ती भएको छ, त्यसका लागि आत्मालोचना पनि गरेका छौँ भन्नुभयो,’ थापाले भने, ‘हामीले उतिवेला देखिनै गल्ती भएको कुरा स्वीकार गर्दै आएको हो भनेर पनि भन्नुभयो ।’

साथै प्रचण्डले थापाको परिवारप्रति आफ्नो पार्टीको उच्च सम्मान रहेको कुरा पनि राखेका थिए । परिवारले पनि आफूहरूबाट भएको गल्तीलाई स्वीकार गरिदिन प्रचण्डले अनुरोध गरे ।