दक्षिण एसियाली शारीरिक सुगठन प्रतियोगितामा नेपाललाई एक स्वर्णसहित तीन पदक

काठमाडौँ । भुटानको थिम्पुमा जारी १६औँ दक्षिण एसियाली शारीरिक सुगठन तथा फिजिक स्पोर्ट्स च्याम्पियनसिपमा नेपालले एक स्वर्ण, एक रजत र एक कास्य पदक जितेको छ।

नेपाल शारीरिक सुगठन तथा फिट्नेस महासंघका सचिव दिनेशकुमार राजभण्डारीका अनुसार प्रतियोगितामा आकाश श्रेष्ठले पुरुष स्पोर्ट्स फिजिकतर्फ १७० सेन्टिमिटरमुनि समूहमा स्वर्ण पदक जित्दै नेपाललाई शीर्ष सफलता दिलाएका हुन्।

त्यसैगरी महिला एथलेटिक फिजिक विधामा सीता खत्रीले रजत पदक हात पारिन् भने पुरुष स्पोर्ट्स फिजिक १७० सेन्टिमिटरमाथि समूहमा पुकार शाक्यले कास्य पदक जितेका छन्।

महासंघका अनुसार पदक विजेता तीनै खेलाडीका लागि यो पहिलो अन्तर्राष्ट्रिय प्रतियोगिता हो। नेपाल भने दक्षिण एसियाली शारीरिक सुगठन प्रतियोगिताको पहिलो संस्करणदेखि नै नियमित रूपमा सहभागी हुँदै आएको छ।