आतंकवादी हमलाको योजना बनाएको आरोपमा बेलायतमा ८ जना पक्राउ

लन्डन । बेलायती प्रहरीको आतंकवाद विरोधी बलले कयौँ इरानीलाई पक्राउ गरेको छ । प्रहरीले उनीहरूले बेलायतमा आतंकवादी हमलाको योजना बनाइरहेको दाबी गरेको छ ।

प्रहरीले यस विषयमा थप जानकारी भने उपलब्ध गराइएको छैन । तर, गुप्तचर सूचनाको आधारमा उनीहरुलाई पक्राउ गरिएको प्रहरीको भनाइ छ । शनिबार छापा मार्ने क्रममा देशका कयौँ स्थानबाट आठ जनालाई समातिएको थियो । शङ्कास्पद व्यक्तिहरूसँग सोधपुछ भइरहेको छ ।

प्रहरीले पक्राउ परेका पाँच जनाको उमेर २९ वर्षदेखि ४६ वर्षसम्म रहेको बताएको छ । चार जना इरानी नागरिकको रूपमा पहिचान गरिएको छ। पाँचौँ व्यक्तिको नागरिकता अझै अनुसन्धानको क्रममा छ । यसबाहेक प्रहरीले थप तीन इरानी नागरिकलाई पनि पक्राउ गरिएको बताएको छ ।

उनीहरूलाई हिरासतमा राखिएको छ । सबै संदिग्धहरूसँग सोधपुछ भइरहेको भए पनि अहिलेसम्म कसैविरुद्ध पनि कुनै अभियोग नचलाइएको बीबीसीको समाचारमा उल्लेख छ ।  गत वर्ष पनि बेलायती सरकारले २० जना संदिग्धलाई हिरासतमा लिएको थियो ।