नाबालक छोराको हत्या गर्ने आमा र सौतेला बाबु पक्राउ

काठमाडौँ । नौ वर्षीय छोराको हत्या गरेर शवलाई जमिनमुनि गाड्ने आमा र सौतेला बुवालाई प्रहरीले पक्राउ गरेको छ । कोहलपुर नगरपालिका ११ कृषिचोकमा कोठा भाडामा लिएर बस्दै आएकी यशोदा बुढा र उनका दोस्रो पति निरकनाथ योगीले मिलेर नौ वर्षीय छोरा कुशल बुढाको हत्या गरेर शव जमिनमुनि गाडेको अनुसन्धानबाट पुष्टि भएको इलाका प्रहरी कार्यालय कोहलपुरले जानकारी दिएको छ ।

कुशल बुढाको शव जमिनमुनि गाडिएको अवस्थामा भेटिएपछि सो घट्नाको अनुसन्धान गर्दै जाँदा सौतेला पिता निरकनाथ योगी र सहोदर आमा यशोदा बुढाले मिलेर बालकको हत्या गरी शव व्यवस्थापन गरेको पाइएकोले दुबैलाई पक्राउ गरेर कर्तव्य ज्यानमा मुद्दा चलाई अनुसन्धान गरिरहेको निमित्त कार्यालय प्रमुख प्रहरी निरीक्षक रेसमलाल पौडेलले बताए । उनका अनुसार मृतक बालकका बुवाको मृत्यु भइसकेको र आमाले दुल्लु नगरपालिका १० का निरक नाथ योगीसँग दोस्रो विवाह गरेकोले ती बालक उनीहरूसँगै कोहलपुरमा बस्दै आएका थिए ।

मृतक कुशलका हजुरबाले सौतेला बुवा योगी र सहोदर आमा यशोदा बुढाले मिलेर बालकको हत्या गरी शव जमिनमुनि गाडेर घटना लुकाउन खोजेको भन्दै प्रहरीका निवेदन दिएका थिए । दुवै जनाले मिलेर बालकको हत्या गरेर शव गाडिसकेपछि आएर प्रहरीलाई वैशाख ८ गते बालक हराएको भनी जानकारी गराएको तर खोजतलासमा कुनै चासो नदेखाएकोले उनीहरूमाथि शंका लागेको र अनुसन्धान गर्दा उनीहरूले नै घटना गराएको खुलेको प्रहरीले जनाएको छ । प्रहरीले ती दुवै जनालाई जिल्ला अदालत बाँकेमा पेस गरेर पाँच दिनको म्याद थप गराई थप अनुसन्धान गरिरहेको निमित्त प्रमुख पौडेलले बताए ।

कोहलपुर माविमा कक्षा तीनमा अध्ययनरत नौ वर्षीय बालक कुशल बुढाको शव बाँकेको बैजनाथ गाउँपालिका-४ नौलापुरमा जमिनमुनि गाडिएको अवस्थामा सोमवार बेलुकी भेटिएको थियो । गाई भैँसी चराउन गएका गाउँका वृद्धहरूले नौलापुरमा सडेको दुर्गन्ध पाएपछि हेर्दा बालकको खुट्टा जमिनमुनिबाट बाहिर निस्किएको देख्दा स्थानीय र जनप्रतिनिधिले प्रहरीलाई खबर गरेका थिए ।