होलीमा हंगामा : भारतको बिहारमा स्थानीयको आक्रमणबाट विवाद मिलाउन गएका एएसआईको मृत्यु

काठमाडौं। होलीको दिन भारतको बिहारको मुंगेर जिल्लामा भएको विवादमा प्रहरीका एएसआईको मृत्यु भएको छ । बिहार प्रहरी संघका अध्यक्ष मृत्युञ्जय कुमार सिंहका अनुसार होलीमा विवाद भएपछि मिलाउन गएका एएसआई सन्तोष कुमार सिंहको मृत्यु भएको हो । 

घटनामा संलग्न दुई जनालाई पक्राउ गरिएको बीबीसी हिन्दीले जनाएको छ । 'सन्तोष कुमारको राति करिब ३ बजे उपचारको क्रममा मृत्यु भएको हो । यो घटना निकै दुखद छ। घटनामा संलग्न दुई जना पक्राउ परेका छन् । साथै यस कार्यमा अरु को–को संलग्न छन् भनेर प्रहरीले पत्ता लगाउनुपर्छ,' बीबीसीसँग उनले भनेका छन् ।

नन्दलालपुर गाउँमा रक्सी पिएपछि एक समूहले हंगामा मच्चाएको खबर आएपछि उनी प्रहरी टोलीसहित घटनास्थल पुगेका थिए । समाचारअनुसार घटनास्थलमा पुगेपछि हंगामा गर्ने समूहले उनीमाथि हमला गरेको थियो ।