वंशजको नागरिकता क्यान्सिल गर्नु हुँदैनः ज्ञानेन्द्र शाही

काठमाडौ । प्रतिनिधिसभा सदस्य ज्ञानेन्द्र शाहीले वंशजको नागरिकता जसले पाएको छ, उसको नागरिकता क्यान्सिल गर्न नहुने बताएका छन् । 

आइतबार गृहमन्त्री रमेश लेखकले नेपाल नागरिकता (दोस्रो संशोधन) विधेयक, २०८१ माथि सामान्य छलफलका लागि पेस गरेको प्रस्तावउपर छलफलका क्रममा शाहीले एक पटकको नेपाली सदाको नेपाली हुनुपर्ने बताए । 

‘वंशजको आधारमा ज–जसले नागरिकता पाएका छन् । विदेशको नागरिकता लिएपनि तिनीहरुको नागरिकता क्यान्सिल गर्नु हुँदैन । किनकी तिनैका पुर्खाले बनाएको देश हो यो । र, आज हामी त्यही इतिहासमा उभिएर नेपालको सांसद, प्रधानमन्त्री र गृहमन्त्री भएको हो’, उनले भने ।

उनले जबजब देशमा क्रान्ति नाममा व्यवस्था परिवर्तन हुन्छ त्यसपछि वंशजको नागरिकता पाउनेको खोस्ने सरकारले विदेशीलाई चाहिँ नागरिकता बाँड्ने सौदाबाजी गर्ने गरेको जिकिर गरे । 

आज एनआरएनएहरुले नेपालमा खर्बौँ लगानी गर्न चाहिरहेपनि नेपालको नागरिकता समेत नहुँदा समस्या भएको बताए । ‘नागरिकता दिएको छ खास्टो, जसले फेरि नि भिसा लगाउनुसपर्छ ।  संसारको कुन देशमा हुन्छ हो त्यस्तो ?’, उनले भने, ‘नागरिकता पनि दिने भिसा पनि लगाउने ?’

यसअघि विनोद कुँवरसहितका गैरआवासीय नेपालीहरुको एक समूहले शाहीलाई यसबारे ध्यानाकर्षण समेत गराएको थियो ।