भीम रावलले धनगढीमा माघ २६ गते मातृभूमि जागरण भेला गर्दै

धनगढी  । नेकपा एमालेबाट निष्कासित भइसकेपछि मातृभूमि जागरण अभियानमा लागेका पूर्व उपप्रधानमन्त्री भीम रावलले माघ २६ गते धनगढीमा जागरण भेला गर्ने भएका छन् ।

आज धनगढीमा आयोजित पत्रकार सम्मेलनमा नेता रावलले कञ्चनपुर र कैलाली केन्द्रीत जागरण भेला आयोजना गरेको हुन् । मातृभूमि जागरण अभियानलाई सशक्त वैकल्पिक शक्तिको रुपमा निर्माणको उद्घोष गरेका उनले भेलामा उपस्थितिको लागि अपिल गरेका छन् । उनले भने, ‘कैलाली र कञ्चनपुरको जागरण भेला शनिबार गर्दैछौ । भेलामा जुनसुकै दलमा आवद्ध रहेका देशभक्त नागरिकहरुलाई उपस्थितिको लागि हार्दिक आह्वान गर्दछु ।’

यसैविच नेता रावलले प्रधानमन्त्री केपी शर्मा ओली नेतृत्वको सरकारले ल्याएको अध्यादेशको विरोध जनाएका हुन् । प्रधानमन्त्री ओलीलाई आज फेरि निरंकुश र स्वच्छेचारी नेतृत्वको आरोप लगाउँदै उनले संसद छलेर ल्याएको अध्यादेशको काम समेत नभएको जिकिर गरे । त्यस्तै, उनले स्थिर सरकार र संविधान संशोधनको लागि काँग्रेस र एमाले मिलेको भनी ती दलहरुले जनतासँग झुठो बोलेको समेत टिप्पणी गरेका छन् ।