चितवनमा गैँडाको आक्रमण बढ्दो : दुई महिनामा ६ जनाले गुमाए ज्यान

चितवन। चितवनमा गैँडाको आक्रमणबाट मानिसको मृत्यु हुने क्रम बढ्दो छ । यही महिना पनि प्रत्येक साता एकजनाको गैँडाको आक्रमणबाट मानिसहरूको मृत्यु भइरहेको छ । 

यही क्रममा हिजो शुक्रबार पनि एक महिलाको गैँडाको अक्रमणबाट मृत्यु भएको छ । हिजो पौने ३ बजेतिर माडी नपा–२ की स्थानीय ६० वर्षीया भुतही महतोको अमलियास्थित जंगलमा घाँस काट्न गएका बेला गैँडाको आक्रमणबाट मृत्यु भयो । 

गैँडाको आक्रमणबाट घाइते भएकी उनको तिघ्रा, कम्मर र छातीमा गहिरो चोट लागेको थियो । उनको स्थानीय बघौडा अस्पतालमा उपचारका क्रममा समयमा राति सवा १० बजे मृत्यु भएको हो । 

गत माघ ९ गते गैँडाको आक्रमणबाट भरतपुर महानगरपालिका–५ विकासचोकका ५५ वर्षीय शिवराज भण्डारीको मृत्यु भएको थियो । भण्डारीलाई माघ ३ गते माडी नगरपालिका–१ ध्रुवचोकमा गैँडाले आक्रमण गरेको थियो । उनको उपचारका क्रममा मृत्यु भएको हो । 

त्यस्तै, माघ १ गते पनि गैँडाको आक्रमणबाट माडीमा एकजनाको मृत्यु भएको थियो । नजिकैको जंगलमा भैँसी चराउन गएका बेला गैँडाले आक्रमण गर्दा माडी नगरपालिका –३ का ५६ वर्षीय छविलाल बोटको मृत्यु भएको थियो । 

त्यस्तै गत पुस १६ गते पनि चितवनमा गैँडाको आक्रमणबाट एकजनाको मृत्यु भएको थियो भने अन्य पाँचजना घाइते भएका थिए । रत्ननगर नगरपालिका–१३ स्थित जयमंगलामा गैँडाको आक्रमणबाट ७० वर्षीया कृष्णाकुमारी थापाको निधन भएको थियो । 

यस्तै, ७८ वर्षीय डम्मरबहादुर थापा, ७२ वर्षीय चेतनाथ चौलागाईं, ३९ वर्षीया सीता पोख्रेल, ६० वर्षीया मिना गुरुङ र २५ वर्षीया पुजन बिक घाइते भएका थिए । यस्तै, पुस १४ गते गैँडाको आक्रमणबाट चितवनमा एक महिलाको मृत्यु भएको थियो । खैरहनी नगरपालिका–१३ की ३२ वर्षीया मेन्दोमाया भण्डारीलाई मध्यवर्ती सामुदायिक वनमा गैँडाले आक्रमण गरेर मारेको थियो । 

यसअघि मंसिर ८ गते नवलपुरमा गैँडाको आक्रमणमा परी नवलपुर मध्यविन्दु–६, भडाराका ६० वर्षीय नाथुराम थारुको मृत्यु भएको थियो ।