गुल्मीमा जिप दुर्घटना, १२ जना घाइते

काठमाडौँ । गुल्मीमा जिप दुर्घटना हुँदा १२ जना घाइते भएका छन् । जिल्लाको सिमलटारी फूलबारीबाट प्युठान गौमुखीतर्फ जाँदै गरेको ग १ ज ४५३३ नम्बरको जिप गुल्मीको अग्लुङ-प्युठान सीमामा दुर्घटना भएको प्रहरीले जनाएको छ ।

जिपमा सवार सबै यात्रु घाइते भएका छन् । मदाने गाउँपालिका वडा नम्बर–१ का अध्यक्ष सुशील चन्द्रका अनुसार घाइतेहरूमध्ये अधिकांशको अग्लुङ स्वास्थ्य चौकीमा उपचार गरिएको छ ।

घाइते केहीलाई थप उपचारका लागि प्युठानको बिजुवार पठाइएको छ ।

जिप सिमलटारीबाट प्युठानमा आयोजना गरिएको गौमुखी मेला हेर्न जाने क्रममा दुर्घटनामा परेको जिल्ला प्रहरी कार्यालय गुल्मीले जनाएको छ ।