वैदेशिक रोजगारबाट फर्केकालाई व्यवस्थापन गर्न माग गर्दै प्रधानमन्त्रीलाई १६ बुँदे ज्ञापन पत्र

काठमाडौँ । रिटर्नी फेडेरेसन नेपालले प्रधानमन्त्री केपी शर्मा ओलीलाई १६ बुँदे ज्ञापन पत्र बुझाएको छ ।

वैदेशिक रोजगारबाट स्वदेश फर्किएका नेपालीहरूको सामाजिक, आर्थिक, राजनीतिक समायोजन र पुनर्स्थापनाका लागि क्रियाशील फेडेरेसनले आइतबार प्रधानमन्त्री ओलीलाई भेटेर ज्ञापन पत्र बुझाएको हो ।

जसमा विदेशबाट फर्केकालाई व्यवस्थापनका लागि नीतिगत व्यवस्था गर्न भनिएको छ । सातै प्रदेश, ६३ जिल्ला र २५४ पालिकामा आफ्नो सञ्जाल विस्तार गरेर रिटर्नीहरुको पहुँच विस्तार गरिरहेको फेडेरेसनले प्रधानमन्त्री समक्ष रिटर्नीहरुले गरेका उद्यमहरूलाई स्टार्टअप सपोर्ट उपलब्ध गराउन ध्यानाकर्षण गराएको छ । त्यस्तै, विभिन्न १६ बुँदामा रिटर्नीहरुले कसरी देशलाई योगदान गर्न सक्छन् र उनीहरूले आफ्नो र परिवारका लागि कसरी स्थापित हुन सक्छन् भन्ने माग र सुझावसहित फेडेरेसनले ज्ञापन पत्र बुझाएको हो ।