मदिराले मातिएर हँसिया प्रहार गर्दा छोराको मृत्यु, बुवा पक्राउ

लमजुङ। मदिराले मातेका एक बुवाले आफ्नो छोरालाई हँसियाले प्रहार गर्दा मर्याङ्दी गाउँपालिका–२ का २७ वर्षीय सोमबहादुर तामाङको मृत्यु भएको छ । जिल्ला प्रहरी कार्यालयका प्रहरी नायब उपरीक्षक निशान्त श्रीवास्तवका अनुसार शुक्रबार बेलुका बुवा-छोरासँगै बसेर मदिरा सेवन गरेका थिए ।

त्यसपछि उनीहरूबीच विवाद भएको थियो । ५७ वर्षीय सन्तबहादुरले प्रहार गरेको हँसियाले सोमबहादुरको घाँटीमा गम्भीर चोट लागेपछि उपचारका लागि अस्पताल लैजाने क्रममा गम्भीर उनको मृत्यु भएको हो ।​ मृतककी एक छोरी र श्रीमती छन् ।

अभियुक्तलाई हिरासतमा लिएर कानूनी कारबाही प्रारम्भ भएको छ । समयमा अस्पताल पुऱ्याउन सकिएको भए उनको ज्यान जोगिन सक्ने तामाङका छिमेकीले बताएका छन् । जिल्ला अस्पतालमा उपचार सम्भव नभएपछि उनलाई चितवन लैजाँदा आज बिहान मृत्यु भएको हो ।