सुदूरपश्चिम प्रदेशमा मुख्यमन्त्रीका लागि आह्वान

काठमाडौं । सुदूरपश्चिम प्रदेशमा नयाँ सरकार गठनका लागि आह्वान भएको छ । मुख्यमन्त्री दीर्घबहादुर सोडारीले पदबाट राजीनामा दिएपछि प्रदेश प्रमुख नजिर मियाँले शुक्रबार नयाँ मुख्यमन्त्रीका लागि दाबी पेश गर्न आह्वान गरेका हुन् । 

संविधानको धारा १६८ (२) बमोजिम दुई या दुई भन्दा बढी दलको समर्थनमा मुख्यमन्त्रीमा दाबी पेश गर्न आइतबार साँझ ५ बजेसम्मको अवधि तोकिएको छ । ५३ सदस्यीय प्रदेश सभामा सरकार गठन गर्न २७ जना प्रदेश सभा सदस्य संख्या आवश्यक हुन्छ । प्रदेशमा कांग्रेसका १८ र एमालेका ११ सांसद छन् । नेपाली कांग्रेस र एमालेको भागबण्डामा सुदूरपश्चिम सरकारको नेतृत्व कांग्रेसको भागमा परेको छ । 

तर, कांग्रेसले भने को मुख्यमन्त्री हुने भन्ने टुंगो लगाएको छैन । संसदीय दलका नेता कमलबहादुर शाह, सांसदहरु प्रकाश देउवा, बहादुरसिंह थापा र दिवानसिंह बिष्टको मुख्यमन्त्रीमा चर्चा छ ।