पश्चिम नवलपरासीबाट २९ लाख ४९ हजारको औषधि बरामद, २ जना पक्राउ

बुटवल। भन्सार छलेर भारतबाट ल्याउँदै गरेको औषधि प्रहरीले नियन्त्रणमा लिएको छ ।पश्चिम नवलपरासीको प्रतापपुर गाउँपालिका–९ चण्डाल टोल नाकाबाट ६ पेटी औषधि इलाका प्रहरी कार्यालय बेलाटारीबाट खटिएको टोलीले आइतवार बिहान नियन्त्रणमा लिएको प्रहरीले जनाएको छ ।​

औषधिसँगै प्रहरीले २ जनालाई पक्राउ गरेको छ । पक्राउ पर्नेमा गोरखाको गण्डकी गाउँपालिका–४ भेंडाबारीका ३० वर्षीय सुजन भन्ने विवेक पोखरेल र बाग्लुङ बडिगाड गाउँपालिका – ५ टारीका २९ वर्षीय अभिषेक खरेल रहेका छन् ।

प्रदेश नं. ३, ०१–००२ च ८९९६ नम्बरको कारमा लुकाएर ल्याएको अवस्थामा २९ लाख ४९ हजार बराबरको औषधि बरामद भएको जिल्ला प्रहरी कार्यालयका सूचना अधिकारी डीएसपी रेशम बोहराले जानकारी दिए ।​

उनका अनुसार बरामद भएका औषधिमा स्लाइनमा प्रयोग हुने आईबी क्यानुला, विभिन्न रोगलगायत सर्जिकलसम्बन्धी औषधिहरू छन् ।भारतमा धेरै नै सस्तोमा पाइने भएकाले भन्सार छलेर औषधि ल्याएको प्रहरीले जनाएको छ ।

उक्त औषधि काठमाण्डौं टिचिङ अस्पताल अगाडि रहेको आफ्नै मेडिकलमा लैजानका लागि ल्याएको प्रहरीले जनाएको छ ।नियन्त्रणमा लिएको औषधिसहित कार र संलग्न व्यक्तिलाई आवश्यक कारबाहीका लागि महेशपुर भन्सार कार्यालय पठाइएको प्रहरीले जनाएको छ ।