दुई दिन बिदा दिने निर्णय सच्चाइयोस्: सांसद पोखरेल

काठमाडौँ । नेकपा एमालेका सांसद लक्ष्मीप्रसाद पोखरेलले दुई दिने बिदा दिने निर्णय सच्चाउन माग गरेका छन् ।

बिहीबार प्रतिनिधि सभाको बैठकमा बोल्दै सांसद पोखरेलले दुई दिने सार्वजनिक बिदाका कारण सरकारी कामकाज सुस्त भएको र आम सेवाग्राहीहरू चरम मर्कामा परेको भन्दै सच्याउन सरकारको ध्यानाकर्षण गराएका हुन् ।

‘सरकारले एक हप्तामा दुई दिन बिदा दिने नियम बनाएको छ । सरकारी कर्मचारी, पारिश्रमिक खाने सबै राष्ट्रसेवकहरू एक हप्तामा दुई दिन बिदाको सुविधा पाउनुभएको छ । तर सेवाग्राहीलाई कति मर्का परेको छ ? सरकारसँग हिसाब छ ? पूरै वर्षमा यसरी हप्ताको दुई दिन बिदा दिँदा सेवाग्राहीलाई समस्या परेको छ,’ उनले भने, ‘शनिवारको बिदा आइतबार दिए हुन्छ । दुई दिनको बिदा बन्द गरेर साविककै एक दिन दिन माग गर्छु ।’