काठमाडौँ । नेकपा एकीकृत समाजवादीले मुलुकमा भूराजनीतिक दबाब बढ्दै गएको निष्कर्ष निकालेको छ । अध्यक्ष माधव नेपालले अपानी जारी गर्दै लोकतान्त्रिक स्थिरताका साथ मुलुक समृद्धि र समाजवादतर्फ अगाडि बढ्ने विश्वासिलो आधार अहिलेसम्म पनि पुनर्स्थापित हुन नसकेको बताए ।
अपानिमा भनेका छन्, ‘बरु राष्ट्रिय राजनीतिले एकपछि अर्को झन्झन्बढि प्रतिकूलताको सामना गर्दैछ । आर्थिक क्षेत्रमा समस्या गहिरिँदै गएका छन्। भ्रष्टाचार र अनियमितताले सामाजिक मनोविज्ञान बिथोलिँदै गएको छ । यही मौकामा दक्षिणपन्थी-पुनरुत्थानवादी शक्तिहरूले संविधान, राष्ट्रिय एकता, सामाजिक सद्भाव र लोकतान्त्रिक मूल्यहरूमाथि औँला उठाउन थालेका छन् ।’
राजनीतिलाई विचारहीन-सिद्धान्तहीन सस्ता नाराको खेल बनाउने प्रवृत्ति बढ्दै गएको उल्लेख छ ।‘मुलुकमा भूराजनीतिक दबाब बढ्दै गएको छ र राष्ट्रिय हितका विरुद्ध अनेक षडयन्त्रहरू हुँदै गरेका आशङ्काहरू बढ्न थालेका छन्। आज मुलुकमा बढ्दै गरेको सङ्कटले राजनीतिमा एउटा प्रभावकारी क्रान्तिकारी हस्तक्षेपको माग गरेको छ । स्पष्ट समाजवादी कार्यदिशा भएको एउटा बलियो लोकतान्त्रिक पार्टीले मात्रै त्यस्तो हस्तक्षेप गर्न सक्छ र आजका सङ्कट समाधानको दिशा देखाउन सक्छ’, अपानिमा उल्लेख छ ।
नेपाली काङ्ग्रेस एउटा उदारवादी राजनीतिक शक्ति भएको हुँदा आजको सङ्कटलाई सामना गर्ने वैचारिक सामर्थ्य उसँग अपेक्षा गर्न नसकिने निष्कर्ष छ ।अपानिमा भनिएको छ, ‘अहिले उठेका कैयौँ प्रश्नमा पनि नेपाली काङ्ग्रेसले आफ्ना नीतिहरू स्पष्ट पारिसकेको छैन । नेकपा एमाले वामपन्थी जनमत भएको ठूलो पार्टी भए पनि संसद विघटनपछि त्यसको नेतृत्वमा झन् बढी वैचारिक, सैद्धान्तिक र साङ्गठनिक समस्याहरूमा जेलिँदै गएका छन् समग्र पार्टी दक्षिणपन्थी व्यक्तिपूजाको सिकार हुँदै गएको छ । कतिपय सैद्धान्तिक कारणले नेकपा माओवादी केन्द्रले अहिलेको राजनीतिमा हस्तक्षेप गर्ने गरी एक्लै पहलकदमी लिन सक्दैन । यस परिस्थितिमा वैचारिक तथा सैद्धान्तिक कार्यदिशाका हिसाबले आजका सङ्कटको वस्तुगत विश्लेषण र समाधानको स्पष्ट बाटो लिएको राजनीतिक शक्ति हाम्रो पार्टी नेकपा एकीकृत समाजवादी नै हो ।’
गत असोज १४-२८ मा हाम्रो पार्टीले आयोजना गरेको ‘समाजवादी जागरण अभियान’ का दौरानमा अहिलेका समस्या र तिनको समाधानबारे सार्वजनिकरुपमा हामीले राखेका धारणाहरूमा देखिएको जनसमर्थनले पनि त्यसलाई पुष्टि गर्ने उल्लेख गरेका छन् ।
अपानिमा भनिएको छ, ’अहिलेको चुनौतीको सामना गर्न सक्ने गरी हाम्रो पार्टी सङ्गठनात्मकता बलियो भैसकेको छैन । विद्रोहबाट जन्मेको र त्यसपछि एकपछि अर्को निर्वाचनमा जानु पर्दा पार्टीलाई सङ्गठनात्मकता विस्तार गर्न आवश्यक समय हामीले पाएनौँ । यदि सही राजनीतिक कार्यदिशा भएन भने सङ्गठनात्मकरुपले शक्तिशाली पार्टी प्रतिगमनको झन्प्रभावशाली हतियार हुँदो रहेछ भन्ने कुरा हामी आफैँले भोगेर आएका छौँ ।’
प्रतिक्रिया दिनुहोस
सफल खबर संवाददाता
विहीबार, ०५ पुस २०८०, २० : ३५
लेखकबाट थप
सम्बन्धित समाचारहरु
नेकपा एसमा प्रतिनिधित्व : ३३ प्रतिशत महिला, २० प्रतिशत युवा
नेकपा एसमा रामकुमारीलाई उपाध्यक्ष बनाउने सहमति
नेकपा एसले पुराना नेतालाई गर्यो सम्मान
नेकपा एसको महाधिवेशनको तयारी पूरा, यस्तो छ नेता बन्ने मापदण्ड
नेकपा एसको अध्यक्षमा घनश्याम भुसाललाई सघाउन झलनाथ खनाल तयार
नेकपा एसमा केन्द्रीय सदस्य स्वतः महाधिवेशन प्रतिनिधि हुने