रास्वपाले थाल्यो घरदैलो अभियानको तयारी तीव्र

काठमाडौँ । राष्ट्रिय स्वतन्त्र पार्टी (रास्वपा)ले घरदैलो अभियानको तयारीलाई तीव्र पारेको छ ।  मंसिर २, ३ र ४ गते रास्वपाले गत मंसिर ४ मा सम्पन्न निर्वाचनमा विजयी गराउने मतदाताहरुको सम्मानमा घरदैलो कार्यक्रम गर्न लागेको हो ।

कात्तिक २३ गते बसेको केन्द्रीय समिति र संसदीय दलको संयुक्त बैठकको निर्णय अनुसार रास्वपाले घरदैलो कार्यक्रम गर्दैछ ।२०७९ असार ७ मा स्थापना भएको रास्वपाले ६ महिना नपुग्दै प्रतिनिधिसभा प्रत्यक्षतर्फ ७ र समानुपातिकमा  ११ लाख ३० हजार ३४४ मत पाएको थियो ।

रास्वपाका सह—महामन्त्री तथा संगठन विभाग प्रमुख कविन्द्र बुर्लाकोटीका अनुसार अभियानमा मुख्यतः दुई एजेण्डा छन् ।‘घरदैलोमा गत निर्वाचनमा विश्वास गरेर मत दिनुहुने मतदातालाई धन्यवाद दिन्छौँ । साथै हामीले आफ्नो प्रतिबद्धता भुलेका छैनौँ । प्रतिबद्धताअनुसार अगाडि बढिरहेका छौँ भनेर भन्छौँ,’ उनले भने ।

बुर्लाकोटीका अनुसार पार्टीका सांसद, केन्द्रीय सदस्य र २०७९ को निर्वाचनका उम्मेदवारहरु घरदैलो अभियान जाने छन् ।  रास्वपाका २१ सांसद र पदाधिकारीसहित ३९ केन्द्रीय सदस्य छन् ।गत निर्वाचनमा रास्वपाले प्रतिनिधि सभाको प्रत्यक्षतर्फ १३१ र १०७ समानुपातिकमा १०७ जना उम्मेदवार खडा गरेको थियो ।

उनीहरु सबैलाई घरदैलो अभियानमा पठाउने तयारीका लागि आज जुम मिटिङ हुने बुर्लाकोटीको भनाइ छ ।‘घरदैलो अभियानको तयारीका लागि केन्द्रीय तहमा आज दिउँसो ४ बजे पहिलो जुम मिटिङ बस्दैछ । आजै साँझ सात बजे अर्को तहको जुम मिटिङ बस्छ,’ उनले भने । अभियानको तयारीका लागि भोलि सातै प्रदेशमा पनि बैठक बस्ने छ ।

गत निर्वाचनमा मत माग्ने हिँडेकै शैलीमा घरदैलो कार्यक्रम हुने बुर्लाकोटीको भनाइ छ । ‘निर्वाचनमा मत माग्न गए जस्तै घर–घर टोल–टोलमा गएर धन्यवाद दिने र हामी प्रतिबद्धतामा अडिक छौँ भन्ने सन्देश दिने हो,’ उनले भने ।

घरदैलो अभियानले आम नागरिकमा आशा जगाउने पनि बुर्लाकोटीले बताए । ‘अहिले व्यवस्थामाथि पनि एक प्रकारको धावा बोलियो भन्ने छ । नागरिकहरु असन्तुष्ट र अन्योलमा रहेको देखिन्छ । मुलुकको आर्थिक अवस्था सिथिल भएका कारणले गर्दा मान्छेमा निराशा छ,’ उनी भन्छन् ।

बुर्लाकोटीले अगाडि भने, ‘हाम्रो घर दैलो अभियानले आम मान्छेमा राम्रो काम पनि भइरहेको छ भन्ने सन्देश दिन्छौँ । आम नागरिकमा एउटा आशा जगाउने काम पनि गर्छौँ।’