जनार्दनले अघि सारे राष्ट्रिय सहमतिको प्रस्ताव

जनार्दनले अघि सारे राष्ट्रिय सहमतिको प्रस्ताव 

 काठमाडौं । नेकपा माओवादी केन्द्रका उपमहासचिव जनार्दन शर्माले राष्ट्रिय सहमतिको प्रस्ताव अघि सारेका छन् । 

शनिवार र आइतबार ललितपुर, काठमाडौँ र काभ्रेमा आयोजित विभिन्न कार्यक्रममा वाग्मती इन्चार्ज समेत रहेका शर्माले राष्ट्रिय सहमतिको सरकार गठनमा जोड दिएका हुन् । 

काभ्रेको धुलिखेलमा आयोजित शुभकामना आदान प्रदान कार्यक्रममा बोल्दै शर्माले अस्थिरता देश विकासको प्रमुख बाधक रहेको बताए । ‘अहिलेको निर्वाचन प्रणाली एवं राजनीतिक कोर्स भित्रबाट कुनै पनि पार्टीको एकल बहुमतको सम्भावना नरहेकाले राष्ट्रिय सहमति दलहरू अघिको आवश्यकता बन्दै गएको छ’, उनले भने ।  

शर्माले कोशी प्रदेशमा देखिएको राजनीतिक सङ्कटलाई स्मरण गर्दै भने, ‘कोशी प्रदेशमा अस्थिरताको जुन परिदृष्य देखिएको छ ।  त्यसले मुलुकलाई सही बाटोमा लैजाँदैन भन्ने स्पष्ट छ ।’

 सङ्घीयता, समावेशी र गणतन्त्रका कमजोरीलाई सुधार गर्नुको साटो भित्रभित्रै संविधानले दिएका त्यस्ता महत्त्वपूर्ण अधिकारलाई अर्थहीन बनाउने गरी बहस सुरु गर्न खोजिएको भन्दै  शर्माले पछाडि फर्कने छुट कसैलाई नभएको बताए ।
 
प्रदेश र स्थानीय तहलाई आवश्यक ऐन, कानुन र पर्याप्त अधिकार नदिएको प्रति पनि शर्माले असन्तुष्टि पोखे । तर, प्रदेशमा सानो आकारको मन्त्रिपरिषद्, थोरै स्थायी कर्मचारी र बाकी करार कर्मचारी नियुक्त गरेर चुस्त ढङ्गले सेवा प्रवाह हुनुपर्नेमा शर्माको जोड थियो ।