विश्वकप लिग-२ मा युएईले ओमानलाई ५४ रनले हरायो

काठमाडौँ । आईसीसी विश्वकप लिग-२ अन्तर्गत युनाइटेड अरब इमिरेट्स (युएई) ले ओमानविरुद्ध अर्को जित दर्ता गरेको छ। कीर्तिपुरस्थित टियु मैदानमा सम्पन्न खेलमा युएईले ओमानलाई ५४ रनले पराजित गरेको हो।

यसअघिको भेटमा पनि युएईले ओमानमाथि २५ रनको जित निकालेको थियो।

युएईले प्रस्तुत गरेको ३०९ रनको लक्ष्य पछ्याएको ओमान ३९।५ ओभरमा २५४ रनमा समेटियो। ओमानका जितेन रमानन्दीले अविजित ९१ रन बनाए पनि टोलीलाई जित दिलाउन सकेनन्। हम्माद मिर्जाले ८३ रनको योगदान गर्दा आर्यान विष्टले २७ तथा वसीम अलीले १२ रन जोडे।

युएईका लागि जुनैद सिद्धिकीले उत्कृष्ट बलिङ गर्दै एक्लैले ६ विकेट लिए। मुहम्मद शहदादले दुई तथा मुहम्मद जवादुल्लाहले एक विकेट हात पारे।

यसअघि वर्षाका कारण ४७ ओभरमा सीमित गरिएको खेलमा टस जितेर पहिले ब्याटिङ गरेको युएईले निर्धारित ओभरमा ८ विकेट गुमाएर ३०८ रन बनाएको थियो।

युएईको इनिङ्समा चार खेलाडीले अर्धशतक पूरा गरे। हरप्रित सिंहले ७७ रन बनाए भने मुहम्मद शहदादले ७४ रन जोडे। अजीव उस्मानीले ७० तथा आर्यान्श शर्माले ५० रनको योगदान दिए। अन्य ब्याटरले भने दोहोरो अंकमा रन बनाउन सकेनन्।

ओमानका तर्फबाट मुहम्मद इमरानले तीन विकेट लिए। नदीम खानले दुई विकेट हात पार्दा आर्यान बिष्ट र शकिल अहमदले समान एक-एक विकेट लिए।