कांग्रेसमा रुपान्तरणको बहसः राजधानीमा एक समूहको भेला

काठमाडौँ । नेपाली कांग्रेसभित्र रुपान्तरणका लागि बहस सुरु हुन थालेको छ । विशेषगरी रास्वपाको पक्षमा जनआकर्षण देखिन थालेसँगै पार्टीभित्र गतिशीलताको खाँचौ औँल्याउँदै रुपान्तरणको बहस सुरु हुन थालेको हो । 

सोही क्रममा आइतबा राजधानीको अनुपम फुडल्याण्डमा एक समूहको भेला सम्पन्न भएको छ । ‘नेपाली कांग्रेस रुपान्तरण अभियान बागमती प्रदेश’ को नाममा भेला भएको हो । 

सो समूहले आगामी जेठ १६ गते हुने रुपान्तरणको पक्षमा माहोल बनाउन वृहत् अन्तरक्रिया गर्न लागेको र त्यसैको तयारीस्वरुप आइतबार भेला गरिएको नेता जनदीश्वर नरसिंह केसीले जानकारी दिए । 

उनका अनुसार जेठ १६ गते हुने अन्तरक्रिया कार्यक्रममा कॉंग्रेसलाई कसरी रुपान्तरण गर्ने भन्नेबारे विस्तृत छलफल गरिने छ । ‘मतदाताले कांग्रेसलाई सुक्ष्म रुपमा हेरिरहेको हुनाने अब यही स्थितिमा २०८४ सालमा चुनावमा जान नसकिने हुनाले अब नेपाली काँग्रेस पार्टी रुपान्तरित हुन जरुरी छ । नेतृत्व र कार्यकर्ता सबै रुपान्तरित हुनु पर्छ’, उनले भने । 

कांग्रेसको १५ औँ  महाधिवेशन र २०८४ सालको चुनावलाई ध्यानमा राखी रुपान्तरण र शुद्धिकरण अभियान शुरु गरेको बताउँदै उनले आफूहरुको कार्यक्रम गुटको नभई सम्पूर्ण नेपाली कांग्रेसको साझा  भएको जिकिर गरे । 

आजको भेलामा अजयबाबु सिवाकोटी, रमेश धमला विकास लामा, जीवन डंगोल, विनोद कायस्थ, मधु आचार्य, ऋषि राम घिमिरे ,राजु श्रेष्ठलगायत दर्जनौँ नेता कार्यकर्ताको सहभागिता रहेको बताइएको छ ।