विद्युत् सर्ट भई आगलागी हुँदा १५ लाखको क्षति

झापा । झापाको गौराहद नगरपालिकामा आइतवार बिहान विद्युत् सर्ट भई फर्निचर उद्योगमा आगलागी हुँदा रु १५ लाख बराबरको क्षति भएको छ ।

गौरादह–१ का मुनिलाल शर्माले गौराहद–२ स्थित गौरादह बजारमा सञ्चालन गर्नुभएको गौरादह पायल फर्निचर उद्योगमा आगलागी हुँदा क्षति भएको जिल्ला प्रहरी कार्यालय झापाका प्रवक्ता प्रहरी नायब उपरीक्षक वसन्त पाठकले जानकारी दिए ।

उनका अनुसार आइतवार बिहान अचानक विद्युत् सर्ट भई आगलागी भएको थियो । आगलागीबाट फर्निचरको छेउमा रहेको बास र टिनको छानो भएको टहरा पूर्णरूपमा जलेर नष्ट भएको छ भने टहराभित्र रहेका मशिन, काठ र फर्निचर जलेर करीब १५ लाख रुपैयाँ बराबरको क्षति भएको हो ।

आगलागी नेपाल प्रहरी, स्थानीय, गौरादह, दमक नगरपालिका र कमल गाउँपालिकाको बारुणयन्त्रको सहयोगमा पूर्ण रूपमा नियन्त्रणमा लिइएको थियो ।