चितवन। भरतपुर महानगरपालिकाको परिणाम यसपटक पनि माओवादीकै पोल्टामा जाने सम्भावना बढेर गएको छ । कांग्रेसका ‘बागी उम्मेदवार’का कारण पनि मेयरमा रेनु दाहाललाई जित्न सहज हुने आँकलन गरिएको छ । भरतपुरमा कांग्रेसका पुराना नेता जगन्नाथ पौडेल ‘बागी उम्मेदवार’का रुपमा मेयरका प्रत्यासी हुन् ।
धरातलीय यथार्थ हेर्दा बागी उम्मेदवार पौडेलकै कारण रेणुको जित सुनिश्चित देखिन्छ । भरतपुरको अवस्था बाहिर प्रचार गरिएजस्तो नरहेको गठवन्धन पक्षीय स्थानीय कांग्रेस कार्यकर्ता बताउँछन् ।
पहिले भरतपुरमा कांग्रेस र माओवादीबीच मेयर र उपमेयरमा मात्रै तालमेल थियो । यसपल्ट भने २९ मध्ये कांग्रेसले उपमेयरसहित २० वटा वडा पाएको छ । माओवादी र नेकपा (एकीकृत समाजवादी) सहितले ९ वटा वडा मात्र लिएका छन् ।
वडामा कांग्रेसले भारी सफलता हात पार्ने देखिन्छ । यसकारण भित्री रुपमा पहिले जस्तो तीब्र असन्तुष्टि नरहेको बताइन्छ । गठबन्धनको पक्षमा भोट हाल्न चितवन कांग्रेसले नै पटक–पटक अपिल गरिसकेको छ ।
बागी र तिनका प्रस्तावक समर्थकलाई पार्टीबाटै निलम्वन गरेको स्थितिमा राजनीतिक भविष्यको लागि पनि गठबन्धनप्रति इमान्दार बन्नुपर्ने बाध्यता कांग्रेस कार्यकर्तालाई छ । अन्यथा पार्टीबाटै निकालिनुपर्ने अवस्थाले कार्यकर्तालाई दायाँबायाँ गर्न कठिन छ ।
उम्मेदवारी फिर्ता गर्न पार्टीले दिएको निर्देशन नमानेको भन्दै मेयरका उम्मेदवार पौडेल, पौडेलका प्रस्तावक कृष्णलाल सापकोटा र कांग्रेसकी महासमिति सदस्य मिना खरेललाई कांग्रेसले निलम्बनको कारबाही गरेको छ ।
कांग्रेसमा ६० वर्ष सक्रिय राजनीति गरेका ८५ वर्षीय सापकोटा कारबाहीमा परेपछि भरतपुर कांग्रेसमा यसले राम्रै झड्का दिएको छ । कडा कारबाहीको डरले बागी र एमालेको पक्षमा कांग्रेसबाट खुलेर भोट माग्न कांग्रेसका वडा तहसम्मका नेताले अब सक्ने छैनन् ।
पार्टीमा बागी र विद्रोही बन्दा राजनीतिक भविष्य नै धरापमा पर्न सक्ने अवस्था रहन्छ । त्यसकारण पार्टीमा भविष्य देख्ने युवा नेताले बागीको पक्षमा भोटको लागि अपिल गर्न असम्भव छ ।
कांग्रेसबाट बागी उम्मेदवारी पर्दा एमाले खुसी हुनु व्यर्थ रहेको भनाई भरतपुरका कांग्रेस कार्यकर्ताको छ । अहिले आएर भरतपुरका स्वतन्त्र मतदाताले समेत बागी उम्मेदवारका कारण एमालेलाई नभएर माओवादीलाई नै लाभ पुग्ने विश्लेषण गर्न थालेका छन् ।
२०७४ सालको निर्वाचनमा भरतपुरमा १ लाख ५० हजार मतदाता थिए । यसपटक यो संख्यामा ३५ हजार थपिएको छ । कुनै पार्टी वा संगठनको ‘व्याक सपोर्ट’ नभएका कारण बागीले जित्ने संभावना भरतपुरमा छैन ।
२०७४ सालमा मेयरमा कांग्रेसका उम्मेदवारले उम्मेदवारी फिर्ता लिँदा पनि सात हजार भोट खसेको थियो । २०७४ मा रेनु दाहालले २ सय ३ मतको झिनो अन्तरले जितेका थिए ।
उनले ४३ हजार १ सय २७ मत ल्याएका थिए । एमालेका देवी ज्ञवालीले ४२ हजार ९ सय २४ मत पाएका थिए । राप्रपाका मेयर उम्मेदवार बद्री तिमल्सिनाले ६ हजार ८ सय ४२ मत ल्याएका थिए ।
यसपटक तिमल्सिना माओवादीमा प्रवेश गरेका छन् । उनी राप्रपामा लोकप्रिय रहेका कारण उनका व्यक्तिगत मतले रेनुलाई फाइदा हुने छ । भरतपुरमा एमाले–राप्रपा गठबन्धन भए पनि बद्रीका कारण पहिलेजति राप्रपाको भेट यसपटक छैन ।
माओवादी एक्लैले २०७४ को चुनावमा वडा तहमा २० हजार मत ल्याएको थियो । रेनु मेयर भएपछि भरतपुरमा सडक, तटबन्ध जस्ता पूर्वाधारमा उल्लेख्य फड्को मारेको छ । जसका कारण स्वतन्त्र मतदाता माओवादीले आकर्षित गर्ने सभावना छ ।
रेनुको कार्यकालमा विकासमा भरतपुरले धेरै प्रगति गरेको छ । विकासकै कारण यसपल्ट रेनुले माओवादीबाटै कम्तिमा ३० हजार मत खसाल्ने अवस्था छ । बागीका कारण कांग्रेसको मत एमालेमा जानबाट रोकिने छ ।
यसपटक भरतपुरमा माओवादीलाई जसरी पनि जिताउने विषयमा गठबन्धन एक ढिक्का छ । भरतपुरमा यसपटक माओवादी आफैले पनि भोट बढाएको छ । कांग्रेसको पनि भोट बढेको छ ।
कांंग्रेसको भोट १५ देखि २० हजारसम्म काटिँदा पनि रेनुले चुनाव जित्ने हिसाब छ । सत्ता गठबन्धनको तर्फबाट कांग्रेसको भोटमा मात्र भरपर्नुपर्ने अवस्था पनि होइन । माओवादी, नेकपा एकीकृत समाजवादी, जसपा, जनमोर्चा र स्वतन्त्र भोटको अवस्था पनि राम्रै छ ।
मुख्य प्रतिस्पर्धी नेकपा एमाले यसपटक झनै कमजोर भएको छ । किनकी, एमाले विभाजन भएको छ । भरतपुर जस्तो ठूलो जनघनत्व भएको ठाउँमा एमाले विभाजन हुँदा ठूलै मत बाहिरिएको छ ।
एमाले विभाजन हुँदा एमालेका कार्यकर्ता अन्य पार्टीका गएका छैनन् । एमालेबाट बिद्रोह गर्दै बनेको नेकपा एकीकृत समाजवादीमै ति मत सुरक्षित छन् ।
एमालेबाट विद्रोह गरी बनेको पार्टी एकीकृत समाजवादीको मत पनि रेनुलाई नै मिल्ने छ । यी आधारमा यसपटक पनि रेनुकै जित सुनिश्चित रहेको विश्लेषण हुने गरेको हो ।
प्रतिक्रिया दिनुहोस
सफल खबर संवाददाता
मंगलबार, २७ बैशाख २०७९, १५ : ४८
लेखकबाट थप
सम्बन्धित समाचारहरु
भरतपुर भ्रमण वर्ष : राप्ती नदीमा छाडिए २० वटा घडियाल गोही
सर्वसाधारणको लागि खुला हुँदै दियालो बंगला, सञ्चालनको जिम्मा भरतपुर महानगरलाई
भरतपुर भ्रमण वर्ष सफल पार्न प्रमुख दाहालको आग्रह
मेयर रेनु दाहाल लन्डनमा ‘अन्तर्राष्ट्रिय मेयर अवार्ड’ थाप्दै
भरतपुर महानगर प्रमुख दाहाललाई बेलायत जान मन्त्रिपरिषद्ले दियो अनुमति
आगामी कार्यभार भरतपुरमा उद्यमशिलताको विकास : प्रमुख दाहाल