ओलीलाई कांग्रेसको प्रश्नः के मुखले भोट माग्दै हुनुहुन्छ ?

काठमाडौँ । कांग्रेसले प्रमुख प्रतिपक्षी एमालेका अध्यक्ष केपी शर्मा ओलीले के भनेर भोट मागिरहेको हो भनेर प्रश्न गरेको छ । कांग्रेसका प्रवक्ता प्रकाशशरण महतले सोमबार पार्टी कार्यालय सानेपामा पत्रकार सम्मेलन गरेर प्रतिपक्षी दलका अध्यक्ष ओलीको आलोचना गरेका हुन् । 

ओली प्रधानमन्त्री हुँदा दुई पटक प्रतिनिधिसभा विघटन गरेको सन्दर्भ उल्लेख गर्दै कांग्रेस प्रवक्ता महतले के मुखले भोट माग्नुहुन्छ भन्दै एमाले अध्यक्ष ओलीलाई प्रश्न गरेका हुन् ।

आर्थिक सुशासन, विकास, अन्तर्राष्ट्रिय सम्बन्ध, संविधान निर्माण, कानुनको शासनको कोणबाट उहाँ असफल हुनुहुन्छ । उहाँको नेतृत्व असफल हो । के मुखले भोट माग्दै हुनुहुन्छ ? उनले भने ,पाँच वर्षका लागि निर्वाचित सरकारको नेतृत्वले साढे ३ वर्षमै २ पटक हात उठायो । पुनःस्थापना भएपछि फेरि विघटन । फेरि पनि पुनःस्थापना भएपछि कांग्रेस आउनुपर्‍यो ।

नेकपा नेतृत्वको सरकार भएका बेला तत्कालीन प्रधानमन्त्री केपी शर्मा ओलीले २०७७ पुस ५ र २०७८ जेठ ८ गते प्रतिनिधिसभा विघटन गरेका थिए । दुवै विघटनलाई सर्वोच्च अदालतले उल्ट्याइदिएको थियो ।

पत्रकार सम्मेलनका क्रममा अधिकांश समय ‌ओलीको आलोचनामा खर्चिएका प्रवक्ता महतले यसअघिको सरकारको पालामा भ्रष्टाचार भएको पनि बताए । उहाँले विकास, सुशासन, भ्रष्टाचारमुक्त समाजको कुरा गर्न मिल्छ ? कमिसनलाई पर्खिँदा(पर्खिदाँ कसले बढी दिन्छ भन्ने बाटोमा जाँदा मुलुकको बेहाल भएको छ ।

कांग्रेस सरकारको नेतृत्वमा आउनेबित्तिकै नेपालप्रति अन्तर्राष्ट्रिय विश्वसनीयता बढेको महतको भनाइ थियो । अनुदान बढ्न लागेको र ऋण घट्न थालेको उनले बताए ।