एनआरएनए विवादः संस्थापन पक्षको सम्मेलन राजनीतिक भएको घले पक्षको आरोप

काठमाडौं । गैरआवासीय नेपाल संघ (एनआरएनए) को विवाद चर्किँदै गएको छ । संस्थापनले १० औं विश्व सम्मेलन शनिबार सुरु हुँदै गर्दा दुई शेष घले नेतृत्वमा यसअघि नै सम्मेलन भइसकेको छ । 

घले समूहले शनिबार संस्थापनले गर्न लागेको सम्मेलनलाई ‘राजनीतिक सम्मेलन’को संज्ञा दिएको छ।  गैरआवासीय नेपाली संघ गैरराजनीतिक संगठन भएकाले राजनीतिक संगठन भएकालेृ त्यसको औचित्य नभएको घले समूहको भनाइ छ । ‘यो त राजनीतिक सम्मेलन भयो । गैरआवासीय नेपाली संघ त गैरराजनीतिक हो । तर, उनीहरुले राजनीतिक आडभरोसामा सम्मेलन गर्दैछन्’, घले पक्षीय एनआरएनएका एक पदाधिकारीले भने ।

ती पदाधिकारीले आफूहरु तिर ठूलो संख्यामा सच्चा एनआरएनएहरु एकताबद्ध हुने बताउँदै राजनीतिक झोला बोक्नेहरु आफै सकिने जिकिर गरे । 
घले समूहको विश्व सम्मेलनले विनोद कुँवरलाई अध्यक्ष चयन गरेको थियो । घलेले नयाँ एनआरएनए बनाएसँगै अन्ततः एनआरएनए दुई वटा बनेको छ । करिब १८ वर्ष लामो इतिहास बोकेको एनआरएनमा राजनीति हावी भएकै कारणले विभाजित बनेको बताइन्छ । घलेले एनआरएनए गैरराजनीतिक भएको भन्दै त्यसको अगुवाइ गरेर कुँवरको नेतृत्वमा संस्था खडा गरेका हुन् । 

यता संस्थापन समूहले भने घलेको महाधिवेनलाई अवैधानिक भन्दै शनिबारदेखि तय भएको सम्मेलन मात्रै आधिकारिक भएको जिकिर गरेको छ । ललितपुरको एक होटलमा हुने सम्मेलन राष्ट्रपति विद्यादेवी भण्डारीले उद्घाटन गर्ने कार्यक्रम रहेको छ । सम्मेलन नयाँ नेतृत्व चयन गर्दै सकिनेछ ।