बैतडीमा मिनी ट्रक दुर्घटना हुँदा एकको मृत्यु, ५ जना घाइते

धनगढी । बैतडीको पाटनमा ट्रक दुर्घटना हुँदा एक जनाको मृत्यु भएको छ। गएराति भएको सो दुर्घटनामा अन्य पाँच जना घाइते भएका जिल्ला प्रहरी कार्यालय बैतडीले जनाएको छ।   

दुर्घटनामा सुर्नया गाउँपालिका ३ की २५ वर्षीया दुर्गा चन्दको मृत्यु भएको हो। पाटन नगरपालिका ६ मा गएराति से १ ख १२४२ नम्बरको मिनी ट्रक दुर्घटनामा परेको हो।

दुर्घटनामा परेर गम्भीर घाइते भएकी दुर्गाको उपचारको क्रममा डडेल्धुरा अस्पतालमा मृत्यु भएको हो। दुर्घटनामा घाइते भएका सुर्नया गाउँपालिका ३ की ३५ वर्षीया माधवी चन्द, ३५ वर्षीया वसन्ती भट्ट, ३३ वर्षीया कलावती भट्ट, २८ वर्षीया बिमला चन्द र २३ वर्षीया पार्वती विष्टको स्थानीय अस्पतालमा उपचार भइरहेको छ।  

दुर्घटनापछि चालक वीरेन्द्र खत्री फरार छन्। उनको खोजी भइरहेको प्रहरीले जनाएको छ।