गठबन्धन र सरकारको रक्षाका लागि एमसीसीलाई पत्र लेखिएको हो : प्रचण्ड

काठमाडौं । एमसीसी मुख्यालयलाई प्रधानमन्त्री शेरबहादुर देउवा र माओवादी केन्द्रका अध्यक्ष प्रचण्डको तर्फबाट लेखिएको पत्र र त्यसबारे राजनैतिक वृत्त तथा जनस्तरमा गरिएका टिप्पणी, क्रिया र प्रतिक्रियाप्रति गम्भीर ध्यानाकर्षण भएको प्रचण्डको सचिवालयले जनाएको छ।  

सचिवालयले आइतबार जारी गरेको प्रेस नोटमा गठबन्धन र सरकारको रक्षाका लागि एमसीसीलाई पत्र लेखिएको स्पष्ट गरिएको छ । ‘प्रतिगमनलाई परास्त गरि भर्खरै गठबन्धन सरकार निर्माण भएको समयमा प्रधानमन्त्रीमाथि एमसीसी पारित गर्नैपर्ने दवाव भएकोले राष्ट्रिय हित तथा गठबन्धन र सरकारको रक्षाका लागि उक्त पत्र लेखिएको थियो’, प्रचण्डको सचिवालयले भनेको छ ।

पत्रमा एमसीसीका लागि राष्ट्रिय सहमति आवस्यक हुने र राष्ट्रिय सहमति निर्माणका लागि सरकारलाई केही समय आवश्यक पर्ने कुरा उल्लेख गरिएको स्पष्ट गरिएको छ । राष्ट्रहितलाई केन्द्रमा राखेर नेतृत्वले गरेको कुटनैतिक पहललाई गलत रूपमा ब्याख्या गर्नु र अनावश्यक रुपमा उछाल्नुको कुनै अर्थ नरहेको पनि प्रचण्डको सचिवालयले जनाएको छ ।