बस पल्टिँदा ९ महिने शिशुको मृत्यु, ९ जना घाइते

दाङ । दाङमा बस दुर्घटना हुँदा ९ महिने शिशुको मृत्यु भएको छ। दुर्घटनामा अन्य ९ जना घाइते भएका छन्। वीरगञ्जबाट सुर्खेत जाँदै गरेको बस देउखुरी नजिकै सडकबाट तल खस्दा दुर्घटनामा परेको हो।

देउखुरी नजिक पर्ने राप्ती गाउँपालिका ५ सिसहनियाँमा बस पल्टिँदा भारतीय नागरिक असिर आलमका छोरा नानु आलमको मृत्यु भएको प्रहरीले जनाएको छ। दुर्घटनामा गम्भीर घाइते भएका शिशुलाई उपचारका लागि कोहलपुर लैजाँदै गर्दा बाटोमै मृत्यु भएको हो।

दुर्घटनामा ९ जना घाइते भएका छन्। घाइते सबै लमही अस्पतालमा उपचारपछि डिस्चार्ज भइसकेका प्रहरीले जनाएको छ। दुर्घटनापछि बसका चालकलाई प्रहरीले नियन्त्रणमा लिएको छ। सोमबार बिहान साढे ३ बजे बस दुर्घटनामा परेको हो।