एनआरएनए कोषाध्यक्ष पदमा लोकप्रसाद दाहालको उम्मेदवारी घोषणा

काठमाडौं । गैरआवासीय नेपाली संघ (एनआरएनए) को कोषाध्यक्ष पदमा लोकप्रसाद दाहालले  उम्मेदवारी घोषणा गरेका छन् ।

वर्तमान कार्यसमितिमा सह–कोषाध्यक्ष रहेका दाहालले आगामी अक्टुबरमा हुन लागेको एनआरएनएको चुनावमा कोषाध्यक्ष पदमा उम्मेदवारी दिन लागेका हुन् । बेल्जियममा व्यवसाय गरेर बसेका दाहालले यसअघि संघको बेल्जियम शाखाको महासचिव र अध्यक्ष भएर काम गरिसकेका छन् ।

विश्वका विभिन्न देशमा मानवीय सेवा तथा कल्याणकारी काममा ख्याती कमाएको बेल्जियमका डाक्टरहरू सहभागी संस्था ‘भ्लाम्स मेडिकल’ मा कार्यकारी सदस्य नियुक्त दाहालको नेपाललगायत एसिया र अफ्रिकाका विभिन्न देशमा परोपकारी काम गरेको अनुभव छ ।
उनले सह–कोषाध्यक्ष भइ कामगर्दा संघको आर्थिक पाटोलाई धेरै हदसम्म व्यवस्थित गर्न सफल भएको बताए ।

उनले भने, ‘आफूमा भएको अनुभव, दक्षता तथा योग्यतालाई एनआरएनए अभियानमा अझ सशक्तढंगले प्रयोग गर्ने इच्छा छ। संघको कोष पारदर्शी, वैज्ञानिक र प्रभावकारीढंगले चलाउन ज्ञान, सीप र योग्यतासहित अगाडि सरेको छु ।’

‘हामीले संघको आर्थिक हिसाव–किताव व्यवस्थित गर्न एउटा ‘सिस्टम’ बनाइसकेका छौं । परिपाटी बसिसकेकोले अव काम गर्न गाह्रो पर्दैन,’ उनले भने ।

शालिन तथा भद्र व्यवहारका उनी सामाजिक अभियन्ता  हुन् । संघभित्र आफ्नो जिम्मेवारी कुशलतापूर्वक समाधान गर्न अहम भूमिका निर्वाह गरेका दाहाल एनआरएनएमा विवादरहित अभियान्ताका रुपमा चिनिन्छन्।