ट्रकको ठक्करबाट मोटरसाईकल दुर्घटनामा परि प्रहरी सहायक निरिक्षकको घटनास्थलमै मृत्यु

वीरगन्ज । बारामा गए राति भएको सवारी दुर्घटनामा परि एकजना प्रहरी सहायक निरिक्षकको मृत्यु भएको छ । पर्साका सखुवा प्रसौनी गाउँपालिका ६ घर भएका ४४ वर्षीय रमेशकुमार राउतको मोटरसाईकल दुर्घटनामा मृत्यु भएको हो ।

उनी रौतहटको ईलाका प्रहरी कार्यालय सन्तपुरमा कार्यरत थिए । बाराको महागढी नगरपालिका २ स्थित भुतही पुल नजिक बुधबार राति सवा नौ बजे प्रदेश २–०३–००१ ख ०७१५ नम्बरको ट्रकले स ५ प ९५३७ नम्बरको मोटरसाइकललाई ठक्कर दिएको थियो। 

रौतहट सन्तपुर स्थित प्रहरी कार्यालयबाट बुधबार राति मोटरसाइकलमा आफ्नो घर फर्किंदै गरेका बेला राउत सवार रहेको मोटरसाइकललाई ट्रकले ठक्कर दिएको थियो। 

मृतकको शव, पोष्टमार्टमका लागि जिल्ला अस्पताल कलैयामा पठाइएको र ट्रक सहित चालकलाई नियन्त्रणमा लिइएको बाराका प्रहरी प्रवक्ता प्रहरी नायव उपरीक्षक गौतम मिश्रले जानकारी दिए।