एमालेको स्थायी कमिटी बैठक बस्दै, स्पष्टिकरण सोधिएका थप नेतालाई कारवाहीको तयारी

काठमाडौं । नेकपा एमालेको स्थायी कमिटीको बैठक आज बस्दै छ । आइतबार बस्ने तय भए पनि प्रधानमन्त्री केपी ओलीको व्यवस्तताले स्थगित गरिएको बैठक सोमबार (आजं) बस्न लागेको हो ।

केन्द्रीय कार्यालयका सचिव शेरबहादुर तामाङले सोमबार बिहान १० बजे प्रधानमन्त्री निवास बालुवाटारमा बैठक बस्न लागेको जानकारी दिए । पछिल्लो राजनीतिक अवस्थाको समीक्षा गर्दै बैठकले आवश्यक निर्णय लिने उनले बताएका छन् । बैठक  स्पष्टीकरण सोधिएका एमाले नेताहरुलाई थप कारबाही लगायतका विषयमा केन्द्रित हुने बताईएको छ । 

यसअघि १० जेठको बैठकले वरिष्ठ नेता झलनाथ खनाल र माधवकुमार नेपालसहित ११ जनालाई पार्टीको साधारण सदस्यसमेत नरहने गरी निष्कासन गरेको थियो भने घनश्याम भुसालसहित थप १२ जनालाई स्पष्टीकरण सोध्ने निर्णय गरेको थियो ।

कांग्रेस सभापति शेरबहादुर देउवालाई प्रधानमन्त्री बनाउन समर्थन रहेको भन्दै हस्ताक्षर गरेका १२ सांसदसँग एमालेले स्पष्टीकरण मागेको थियो । ति सांसदहरुले स्पष्टिकरणको जवाफ बुझाएका छैनन् ।