माधव नेपालले धोका दिनुभएको छैन, फेरि ७६ (५) मा पनि भेट हुन सक्छ : प्रचण्ड

काठमाडौं । नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ले आफ्नो र माधवकुमार नेपालको भेट फेरि हुनसक्ने बताएका छन् । अध्यक्ष प्रचण्डले माधव नेपालले धोका नदिएको बताए । अध्यक्ष प्रचण्डले भने, ‘माधवकुमार नेपालले धोका दिएको रूपमा त्यसरी मैले बुझ्दिनँ, हाम्रो भेट फेरि ७६ (५) मा हुनसक्छ ।’

कोरोनाविरुद्ध खोप लगाउन संसद भवन पुगेका दाहालले अबको राजनीतिक कोर्स चुनौतीपूर्ण र सम्भावनायुक्त रहेको बताए । प्रचण्डले भने, ‘म आशा गर्छु सत्यको पक्षमा, लोकतन्त्रको पक्षमा र संविधानको पक्षमा माधव नेपालसँग हाम्रो एकता रहन्छ ।’

संविधानको सो धारामा प्रधानमन्त्रीले ७६ (४) अनुसार विश्वासको मत प्राप्त गर्न नसकेमा बहुमत पुर्‍याउँछु भन्ने कुनै सदस्यलाई राष्ट्रपतिले ५ अनुसार प्रधानमन्त्री नियुक्ति गर्ने व्यवस्था छ । जहाँ सांसदहरूलाई दलको ह्वीप लाग्दैन । यस्तो बेलामा ७६ (५) मा माधव नेपालसँग भेट हुनसक्ने प्रचण्डको भनाइ छ । प्रचण्डले संविधान र लोकतन्त्र कमजोर पार्ने प्रवृत्तिसँग संघर्ष जारी रहने बताए ।