कांग्रेस संसदीय दलको निष्कर्ष : विश्वासको मतको विपक्षमा मतदान गर्ने, आफ्नै नेतृत्वमा सरकार बनाउने

काठमाडौँ । प्रमुख प्रतिपक्षी नेपाली काँग्रेसले विश्वासको मतको विपक्षमा मतदान गर्ने र सबै दलको सहमति र सहकार्यमा आफ्नै नेतृत्वमा सरकार बनाउने निर्णय गरेको छ । 

काँग्रेस संसदीय दलको शनिबार बसेको बैठकले प्रधानमन्त्री केपी शर्मा ओली विश्वासको मत लिन आउँदा विपक्षमा मतदान गर्ने निर्णय गरेको छ । कांग्रेसले अरु दललाई पनि प्रधानमन्त्री ओलीलाई विश्वासको मत नदिन आग्रह गरेको छ । पार्टी सभापति शेरबहादुर देउवाले बैठकमा ब्रिफिङ गर्दै आफ्नो नेतृत्वमा सरकार निर्माणको सम्भावना पनि बढेको बताएका छन् । 

बैठकले पार्टी केन्द्रीय कार्यसमितिको चैत २१ गतेको निर्णय पनि अनुमोदन गरेको छ । २१ चैतमा काँग्रेस केन्द्रीय कार्यसमिति बैठकले प्रधानमन्त्रीको राजीनामा माग गर्ने र आफ्नै नेतृत्वमा सरकार गठनको पहल गर्ने निर्णय गरेको थियो ।