संखुवासभामा बस दुर्घटना, कम्तीमा २० जना घाइते

देउराली । संखुवासभामा बस दुर्घटना भएको छ । प्रहरीका अनुसार दुर्घटनाबाट कम्तीमा २० यात्रु घाइते भएका छन् । संखुवासभा जिल्लाको धर्मदेवी नगरपालिकामा बस दुर्घटना भएको प्रहरीको भनाइ छ । 

४० जना भन्दा बढी यात्रु बोकी संखुवासभा मादी नगरपालिकाबाट धरानतर्फ आउँदै गरेको को १ ख २८२४ नम्बरको शुभम डिलक्स  बस धर्मदेवी नगरपालिका–४ को दोभान रिसोर्टनजिकै बगरमा दुर्घटना भएको मादि नगरपालिकाका मेयर  विदुर लिङ्थेपले जनाएका छन् । 

उनका अनुसार दुर्घटनामा घाइते भएकाहरूलाई  गुल्म नम्बर ४ सशस्त्र प्रहरी बल चैनपुर र इलाका प्रहरी कार्यालय चैनपुरसहितको सुरक्षाकर्मीले उद्दार गरी धरान स्थित बीपी कोइराला स्वास्थ विज्ञान प्रतिष्ठानमा लगिएको छ । सडकबाट २० मिटर भन्दा तल खसेको बसको स्टेरिङ फेल भएर दुर्घटना भएको बताइएको छ  । 

चालक धरान १५ का अन्दाजी वर्ष ५४ का विष्णु रसाईली इलाका प्रहरी कार्यालय चैनपुरले नियन्त्रणमा लिएको छ ।