प्रधानमन्त्री ओलीको तयारी : ‘अनुशासनको डण्डा, लिखित कारवाही देखि निष्काशन सम्म’

सफल खबर संवाददाता

शुक्रबार, २८ फागुन २०७७, १२ : ००
प्रधानमन्त्री ओलीको तयारी : ‘अनुशासनको डण्डा, लिखित कारवाही देखि निष्काशन सम्म’

काठमाडौं । ‘नेकपा’ नामको विवादमा सर्वोच्च अदालतको निर्णयका कारण तीन वर्षपहिले एकताबद्ध भएको पार्टीलाई पुनः फरक बनाइदिएपछि त्यसको लाभ यतिखेर सबैभन्दा बढी प्रधानमन्त्री केपी ओली र उनको गुटलाई भएको छ । अदालतको फैसलाका आधारमा ओली गुटसँग नै जानुपर्ने भएपछि माधवकुमार नेपाल र उनको समूहलाई अब सबैभन्दा बढी पेलान उनै ओलीबाट हुने निश्चित जस्तै छ । 

Yeti Diistillery Tansen Cement box

तत्कालीन एमालेभित्र पार्टीको बागडोर हातमा लिएपछि नै ओलीले नेपाल पक्षलाई जुनखालको व्यवहार देखायो र ज्यादती ग¥यो, त्यसले पक्कै पनि सामान्य राजनीतिक चेत भएका मानिसलाई पिडा हुन्छ । ओली कतिसम्म असहिष्णु छन् भन्ने कुरा उनले सार्वजनिक रुपमा दिने अभिव्यक्ति तथा व्यवहारबाट नै पुष्टि हुन्छ । ओलीले राजनीतिको नाममा नेपाल लगायतका नेतालाई कुन हैसितयमा राख्ने चेष्टा गर्छन् । ति सबै उनको व्यवहारबाट घाम जस्तै छर्लङ छ । एमाले ब्ँयूतिएसंगै उनले आफना सहकर्मीलाई अनुशासनको डण्डा लगाउने, कारवाही गर्ने, निष्काशन गर्नेसम्मको हर्कत शुरु गर्ने संकेतहरु देखा परेका छन् । 

देशभर जिल्ला पार्टी कार्यालयमा ओली गुटले मंगलबारदेखि देखाएको व्यवहार त्यसैको उपज हो । ओलीले जुनखालको स्कूलिङ गरेका छन्, त्यो विचारको होइन भन्ने धेरै अड्कलबाजी शुरु नभएको हैन्, ओली गुट विचार, सिद्धान्त र निष्ठाले नभई ज्यादतीले निर्णय गर्छ । ओलीका अधिकाशं कार्यकर्ताहरु विचारका आधारमा होइन, शक्तिमा मात्रै भर पर्छन् ।  ओली गुटले नेपाल पक्षका कोही कसैसँग पनि विचार र सिद्धान्तका आधारमा व्यवहार गर्दैनन् । उनीहरुको सोच अरुलाई खुइलयाउन, हेला होचो गर्न मात्रै उद्यत् छन् । विशेष गरी भारतमा मोदीले चलाएको सामाजिक फासीवादको अन्धनक्कल गर्न चाहन्छन्, उनीहरु । जताततै सेटिङको भरमा गुट विस्तार गर्न उनीहरु लालायित छन् ।

सर्वोच्च अदालतले फैसला गरेको चार दिन बित्न लाग्दा समेत ओली र उनको गुटले नेता नेपाल, वरिष्ठ नेता झलनाथ खनाल लगायतका नेताहरुसँग गरेको व्यवहारले पनि उनीहरु कुन हद सम्म असहिष्णु छन् भन्ने पुष्टि भएको छ । परिस्थितीले एमाले ब्ँयूताएपनि एकै पार्टीका नेता र सहकर्मीको व्यवहार ओलीबाट नहुँदा त्यसको घाटा अन्तर्यमा त ओलीलाई नै हुनेछ । केही समयभित्र एमालेको महाधिवेशन हुन्छ । महाधिवेशनमा ओलीको ज्यादीका विरुद्ध उभिने संख्या र जनमत बढ्दै जानेछ । किनकी विचारशून्यताका आधारमा अगाडि बढ्ने जमात र विचारका आधारमा अगाडि बढ्ने संस्कारका बीचमा राम्रै टकराव हुने अवस्था आउनेछ । त्यो अवस्थामा देशभर पुनः नेपाल र उनको समूहको बहार आउने कुरालाई नकार्न सकिदैन । 

तर, तत्कालका हकमा हेर्दा ओली गुटले उठ्नै नसक्ने गरी नेपाल समूलाई पेल्ने, आत्मसमर्पण गराउने साजिस हुन सक्छ । सधै विधि, नैतिकताको विषयलाई प्रमुखताका साथ उठाउने नेपाल र उनको समूहले ओली गुटको कुन आधारमा र कुन हदसम्म कसरी प्रतिवाद गर्छ, त्यसले भावी राजनीतिक दिशा र गतिको तय गर्नेछ । ओलीको पेलान मात्रै सहीरहने, कुनै प्रतिवाद नगर्ने हो भने उनले भन्दै आएको विचार र विधिको विषय पनि त्यत्तिकै हराएर जानेछ ।  माधव नेपालहरुले बृहद कम्युनिस्ट एकताका लागि पहल गर्नुपर्नेछ । उनीहरुले अदालतको आदेशका भरमा फुटाइएको पार्टीलाई पुनः एकताबद्ध बनाउने नीति, कार्यक्रम र योजना बनाउनुपर्नेछ ।

पार्टीभित्र हुर्किएको सामाजिक फासीवादको समूल अन्त्यका लागि योजना बनाउनुपर्नेछ । ओली र उनको गिरोहले विस्तार गरेको अराजकतालाई अन्त्य गरेर समाजवाद स्थापना गर्ने पार्टी निर्माणका लागि मार्ग प्रशस्त गर्नुपर्नेछ । झण्डै दुई तिहाई जनमत प्राप्त नेकपालाई जसरी ओलीले सिध्याए र सिध्याउनका लागि जुनखालको हर्कत गरे, त्यसको तत्काल नै प्रतिवाद शुरु गर्नुपर्ने राजनीतिक विश्लेषकहरुको ठहर छ । नेपाल  मामिला हेर्दै आएका भारतीयहरुको भनाईलाई पत्याउने हो भने ओलीलाई उचालेर भारतीय संस्थापन पक्षले नेपालको राजनीतिमा चलखेल गरेको छ । रअका प्रमुख सामान्त गोयलबाट शुरु भएको चलखेल पछिल्लो पटक सर्वोच्च अदालतको निर्णयसँग पनि जोडिन आइपुगेको छ ।

नेपालमा कम्युनिस्ट बढेको, झण्डै दुई तिहाई जनमत प्राप्त भएको विषय भारतीयहरुलाई मन परेको थिएन । भारत नेपालको परिवर्तन आफूलाई परिवर्तनकामी भनिनेहरुबाटै उल्ट्याउन चाहन्छ भन्ने पुस्टि भएको छ ।  ओली खुफिया एजेन्सीका लागि काम गर्छन् भन्ने पनि पुष्टि भएको छ । ओलीले देखाएको व्यवहार र भारतीयहरुले गरिरहेको प्रतिक्रियाका आधारमा हेर्दा पनि आम मानिसले गरेको आशंकामा बल पुगेको छ । यस्तो अवस्थामा माधव नेपाल समूहले तत्काल स्पष्ट पार्न पहल गर्नुपर्नेछ । समाजवादको यात्रालाई अगाडि बढाउने हो भने तत्काल पार्टीभित्र हुर्किएको अराजकता र खुफिया एजेन्सीको तावेदारी गर्ने प्रवृत्तिका विरुद्ध जनमत बनाउनेतर्फ लाग्नुपर्नेछ । 

कम्युनिस्ट आन्दोलनलाई एकतावद्ध बनाएर लैजाने साहस माधव नेपालमा छ । त्यसलाई कार्यान्वयनमा लैजानु जरुरी छ । ओलीहरु भत्काउन मात्रै जान्दछन् । ओलीहरु ध्वशंका प्रयाय हुन्, प्रतिगमनका मतियार हुन् । प्रतिगमनका विरुद्ध उभिने साहस नेता नेपालहरुले गर्नुपर्नेछ । रचनात्मक निर्माणका लागि प्रतिवद्ध  हुनुपर्नेछ । अब दुई वर्षपछि प्रतिनिधिसभाको निर्वाचन हुनेछ । त्यतिबेलासम्म जनतालाई पुनः विश्वासमा लिएर जनमत लिने दिशामा नेपालहरुले वातावरण बनाउनुपर्नेछ । 

पेरिसडाँडाबाट अमिलो मन बनाएर छुट्टिएका नेताहरुमा भातृत्व, एकता र मैत्रीभाव कायम छ , हामी आफनो विचारमा प्रतिवद्ध छौ, भन्ने स्थापित गर्नुपर्ने छ । न कि ओलीको गलत व्यवहार र चिन्तनलाई खारेज गर्दै अग्रगामी दिशाका लागि पहल कदमी गर्नु नै आजका लागि नेपालहरुका लागि प्रमुख कार्यभार रहेको राजनीतिक विश्लेषकहरुको भनाइ छ । 

प्रतिक्रिया दिनुहोस