प्रधानमन्त्री ओलीले आज कोरोना खोप लगाउँदै

काठमाडौं । प्रधानमन्त्री केपी ओलीले आज कोरोनाको खोप लगाउँदैछन् ।महाराजगन्जस्थित त्रिवि शिक्षण अस्पतालमा पुगेर  कोरोना भाइरसविरूद्धको खोप लगाउने प्रधानमन्त्रीको सचिवालयले जनाएको छ ।

ओली सहित सम्वैधानिक अंगका सवै प्रमुखहरुलाई पनि आजैकोभिड १९ विरूद्धको खोप दिइने भएको छ । आजैवाट दोश्रो चरणको खोप कार्यक्रम शुरु हुँदैछ ।

प्रधानमन्त्री ओलीले खोप लगाएसँगै कोरोनाविरूद्धको खोप लगाउने अभियानको दोस्रो चरण सुरू हुन लागेको हो । आजैबाट ६५ वर्ष उमेर समुह माथीका जेष्ठ नागरिकहरुले पनि खोप लगाउने कार्यक्रम स्वास्थ्य तथा जनसंख्या मन्त्रालयले तय गरेको छ ।

आइतबार कोभिड– १९ विरूद्धको कोभ्याक्स खोपको पहिलो खेप नेपाल आउँदै छ । भारत सरकारले उपलब्ध गराएको खोप र कोभ्याक्स सहायता प्राप्त खोप ६५ वर्षमाथिका ज्येष्ठ नागरिक, सरकारी र निजी विद्यालयका शिक्षक तथा कर्मचारी, महाविद्यालय, विश्वविद्यालयका प्राध्यापक र सार्वजनिक यातायातका चालक र सहचालकलाई प्राथमिकतामा राखेर दोस्रो चरणमा लगाउन लागेको सरकारले जनाएको छ ।